Keıipkerimiz Nurbolat Ysqaqov sýret álemine kezdeısoq kelgen jan emes. Boıyn kernegen bula sezim ómirdiń óz sýretterin qaz-qalpynda qaǵazǵa túsirtip, kóńildegi kórikti oıdy kenep betine órgizdi. Aq pen qara almasqan alasapyran tirshiliktiń alýan tústi boıaýlary sanasynda syzylyp, balaǵa mıras bolǵan baba amanatyn óner tilinde bolashaqqa jetkizýdi ómirlik muratyna balady. Qysqa baqqa qyzyǵyp, ataqty bolam dep arpalysqan joq. О́mir shyndyǵyna záredeı qııanat keltirmeı, kórgeni men túıgenin móldirete otyryp býyrqanǵan boıaýlarǵa aınaldyrdy. Qasteevten jalǵasqan qasıetti mura qaltarysta qalmasa degen tilek qylqalam sheberin degdar ónerdiń tuńǵıyǵyna boılata beripti. Onyń kenebinde taý men aspan, adam men tabıǵat bir-birimen bite qaınasyp jatady.
«Nurbolat Ysqaqovtyń peızajdarynyń tartymdylyǵy onyń tabıǵatqa degen ystyq yqylasynda, shynaıy shyndyqty kóre bilýinde, ony romantıkalyq aspektide qabyldaı alýynda jatyr. Shyǵarmalarynan sýretshiniń emosııalyq qabyldaýy men kóńil kúıine saı san qubylǵan kórinisin kórýge bolady. Oı tolǵamynyń epıkalylyǵy avtordyń jany men júreginen shyqqan qorshaǵan ortanyń árbir talshyǵyna degen súıispenshiligimen toǵysqan. Tústik qatynastary boıaýdyń jatyqtyǵy men úılesimine qaraı umtylady» deıdi ónertanýshylar.
Sýretshiniń qylqalamynan órilgen sulý peızajdarǵa kóńil kózińizben boılasańyz, aspannyń asqaqtyǵyn, taýlardyń bıiktigin, jylqynyń minezin, adam kóńil kúıiniń san taraý yrǵaqtaryn, týǵan jerdiń tumsa tabıǵatyn múlde bólek qyrynan kóresiz. Tabıǵatpen úılesimdi sezimdi serik etken avtor estetıkalyq muratyna saı tyń obrazdar tabýǵa talpynady.
Myna bir kartınada ushar basy aspanmen astasqan Táńirtaýdyń etegin boılaǵan alyp jotalardyń kerim kelbeti kóz qaryqtyrady. Jadyraǵan jaz maýsymyn jyrlaǵan jasyl jaılaý jan jadyratyp, kóńil baýraıdy. Myń aqyn jyrlasa til jetpeıtin tabıǵat-ananyń tamasha keıpine tańǵalmasqa sharańyz joq. Osy sulýlyqtyń barlyǵyn sýretshi óz jan-dúnıesi arqyly úılesimdi tústermen ásemdegen. Sulý qyzdyń kúlkisindeı syldyrap aqqan taý ózeni kenepke ózgeshe órnek syılap tur. Qylqalamnan órilgen Shoqan men Muqaǵalı sulbasy tarıh bederinde qattalǵan qaıtalanbas sátterdiń keskin kelbeti dep uǵarsyz. Al soǵystan oralmaǵan perzentin zaryǵa kútken zarly ananyń qasiretin beınelegen keıýana keıpi zarly zamananyń zapyranyn dál anyqtap beretindeı.
Ol oılanyp otyr... Kóńilde sulbasy syzylǵan sulýlyqty óltirip almaı, qalaıda taza qalpynda ómirge ákelý kerek. Mı qabyǵyn kemirgen aýyr oılardyń qursaýynan arylýdyń jalǵyz joly sol ǵana. Tún tynyshtyǵyn buzǵan ala kúshik qaljyraǵan sýretshiniń halin uqqandaı aýyq-aýyq úredi. Tań sebezgileı bastady. Ishtegi alaı-dúleı arpalys sap tıylyp, sońǵy boıaý jaǵyldy. Shynaıy sezimmen órilip, sýretshiniń júreginen ótken kezekti týyndy qolmen emes, janmen jazylǵan shyǵarma dep atalady.
Qolmen emes, janmen jazylǵan dep bilińiz.
Arman OKTIаBR,
«Egemen Qazaqstan»
ALMATY
