«QIK» IU» AQ-nyń jańa ıpotekasy Qazaqstannyń barlyq turǵyndaryna bastapqy jáne qaıtalama turǵyn úı naryǵynan, olardyń jeke menshiginde basqa turǵyn úıdiń bar-joǵyna qaramastan, jyljymaıtyn múlik satyp alýǵa múmkindik beredi. Nesıelendirý ekinshi deńgeıdegi bankter arqyly júzege asyrylatyn bolady, olar «QIK» IU» AQ-nyń tutynýshylardy tartý men qaryz berý boıynsha seriktesteri retinde áreket etedi.
Tólem qabilettiligin tolyq rastaǵan kezde, qaryz alýshylar úshin ıpotekalyq qaryz mólsherlemesi jyldyq 12%-ti, kiristi ishinara rastaǵan kezde - jyldyq 14%-ti quraıdy. Qaryzdyń eń kóp somasy - 40 mln. teńgeni, eń azy - 1 mln. teńgeni quraıdy. Qaryz merzimi - 20 jylǵa deıin. Qazaqstannyń 16 qalasynda ıpoteka qoljetimdi bolady. Jasy 21-den joǵary Qazaqstannyń kez kelgen azamaty qaryz alýshy bola alady. Nesıeni óteý sátinde Qaryz alýshynyń nemese Qosalqy qaryz alýshynyń jasy zeınetkerlikke shyǵatyn jastan aspaýy tıis.
«Orda» ıpotekasy kiris tolyq rastalǵan kezde turǵyn úı qunynyń 30%-nen bastap jáne ishinara rastalǵan kezde 50%-nen bastap bastapqy jarna tóleýdi kózdeıdi. Bul rette bastapqy jarna qaryz alýshyǵa nemese úshinshi tulǵalarǵa tıesili jyljymaıtyn múlik túrinde qosymsha kepilmen aýystyrylýy múmkin.
«Qazaqstan Ipotekalyq Kompanııasy» IU» AQ Basqarmasynyń Tóraǵasy Ádil Muhamedjanov: «О́z mıssııamyzdy oryndaı otyryp - ártúrli ıpotekalyq baǵdarlamalardy júzege asyrý arqyly turǵyn úıge qoljetimdilikti arttyrýda - biz kóptegen qazaqstandyqtardyń óz turǵyn úı jaǵdaılaryn jaqsartýyna múmkindik beretin ıpotekany ázirledik. Ońtaıly syıaqy mólsherlemesi, retteletin qaryz merzimi men bastapqy jarna mólsheri, kiristi ishinara rastaý múmkindigi, sondaı-aq qaryzdyń eń kóp qomaqty somasy – bul búgingi kúni naryqtaǵy qajet bolatyn ıkemdi talaptar. Qaryz alýshylar ózderi úshin yńǵaıly bastapqy parametrlerdi tańdap, aı saıynǵy qolaıly tólemdi anyqtaıdy jáne ózderine unaǵan kez kelgen turǵyn úıdi satyp ala alady».
«Nurly jer» turǵyn úı baǵdarlamasynyń «Ipotekalyq qaryzdar boıynsha syıaqy mólsherlemesin sýbsıdııalaý» baǵytyn júzege asyrý aıasynda seriktes bankter arqyly ıpotekalyq ónimderdi nasıhattaý tájirıbesi bar Kompanııa ekinshi deńgeıdegi banktermen jumys isteýdiń uqsas shemasyn qoldanýǵa nıetti: klıent páterdi óz betinshe tańdaıdy jáne seriktes bankpen baılanysady, seriktes bank qajetti qujattardy qabyldaıdy jáne Kompanııaǵa ótinish jiberedi, Kompanııa óz kezeginde qaryz alýshynyń tólem qabilettiligin tekseredi jáne Bankke óz sheshimin usynady. О́tinimdi qaraý merzimi baǵdarlamada kelisilgen jaǵdaılardy qospaǵanda, úsh jumys kúninen aspaıdy. Qaryz maquldanǵan kezde kepil ustaýshy jáne kepil berýshi retinde Qazaqstan Ipotekalyq Kompanııasy áreket etedi.
