Erler saıysynyń alǵashqy kúni Mıhaıl Kýkýshkın súrindi. ATR tiziminde 73 orynda turǵan jerlesimiz tusaýkeser kezdesýde álemniń 105 raketkasy, reseılik Evgenıı Donskoıdan utyldy – 4:6, 6:7. Odan keıin Aleksandr Býblık jeńilistiń kermek dámin tatty. Ol fransııalyq Per-Iýg Erberge ese jiberdi – 3:6, 4:6.
Áıelder arasyndaǵy elimizdiń birinshi raketkasy Iýlııa Pýtınseva tusaýkeser kezdesýinde rýmynııalyq Irına Begýdi 6:2, 6:0 esebimen oısyrata utyp, óz jankúıerlerin bir qýantyp tastaǵan edi. Alaıda ekinshi kezeńde ol tym myqty qarsylasqa tap boldy. Jerlesimizdiń WTA reıtınginde 11 satyǵa jaıǵasqan 28 jastaǵy Latvııanyń oıynshysy Anastasııa Sevastovaǵa áli jetpedi – 5:7, 6:4, 4:6.
Búgin jáne erteń «Kreml kýbogy» jolyndaǵy jarystyń shırek fınaldyq saıystary ótedi. Al jeńimpazdar 21 qazanda anyqtalady. Esterińizge sala keteıik, Máskeýdegi týrnırdiń júlde qory erler arasynda 392 866 jáne áıelder arasynda 932 566 AQSh dollaryn quraıdy.
Ǵalym SÚLEIMEN,
«Egemen Qazaqstan»
