Aımaqtar • 19 Qazan, 2018

Oralda Assambleıa músheleri keńesti

Oral qalasyndaǵy Dostyq úıinde Batys Qazaqstan oblysynyń ákimi, Batys Qazaqstan oblystyq Qazaqstan halqy Assambleıasynyń tóraǵasy Altaı Kólginovtiń tóraǵalyǵymen Assambleıanyń keńeıtilgen keńesi ótti.

Egemen Qazaqstan

Mańyzdy jıynǵa Batys Qazaqstan oblystyq basqarma basshylary men ókilderi, qala jáne aýdandar ákimderi, Batys Qazaqstan oblysy Qazaqstan halqy Assambleıasy qurylymdyq bólimsheleri, etnomádenı jáne qoǵamdyq birlestikter, buqaralyq aqparat quraldary ókilderi qatysty.

Keńestiń kún tártibinde Batys Qazaqstan oblysy Qazaqstan halqy Assambleıasy sessııalarynyń, keńesteriniń sheshimderiniń Oral qalasynda oryndalýy, 2019 jylǵa arnalǵan memlekettik áleýmettik jobalardy bekitý, qoǵamdyq kelisim keńesteri qatysýymen aýdan men aýyldyq okrýgterdegi jergilikti bıýdjetti tıimdi paıdalanýdyń erejesin bekitý, Batys Qazaqstan oblysy «Jańǵyrý joly» jastar qozǵalysynyń 2019 jylǵa arnalǵan jumys jospary, Batys Qazaqstan oblysy Qazaqstan halqy Assambleıasy etnomádenı birlestikterin qoǵamdyq akkredıtasııalaý komıssııa músheleriniń quramyn bekitý jáne Assambleıa Keńesiniń jáne qurylymdyq bólimsheleriniń quramyna ózgerister engizý týraly máseleler qaraldy.

Jıynda Batys Qazaqstan oblysy ákimi apparaty «Qoǵamdyq kelisim» mekemesiniń basshysy Medhat Qambetov 2019 jyly ótkizý josparlanǵan 15 memlekettik áleýmettik jobany keńes múshelerine tanystyryp ótti. Munyń ishinde «Úzdik eldimeken», «Shekara júrekterdi bólmeıdi», «Babalardyń kózindeı qasıetti dombyra», «Alǵys aıtý kúni» sııaqty sharalar burynnan dástúrge aınalǵan. Sonymen qatar «Myqty eldiń myqty adamdary», «Ult qazynasy», «Etnofeshn» sán festıvali sııaqty birqatar jańa joba bıyl tuńǵysh ret qolǵa alynǵaly otyr.

Aldaǵy 2019 jyldyń jastarǵa arnalatynyn Elbasymyz Joldaýda jarııalaǵan edi. Batys Qazaqstan oblystyq «Jańǵyrý joly» jastar qozǵalysynyń tóraǵasy Vladımır Shek «Jastar jyly» aıasynda óńirdiń barlyq aýyl-aımaǵyn qamtıtyn keshendi sharalar uıymdastyrylatynyn aıtady.

Oral qalasynyń ákimi Murat Muqaevtyń aıtýynsha, qala aýmaǵynda Batys Qazaqstan oblystyq Qazaqstan halqy Assambleıasynyń sessııalary men keńesteri sheshimderi der kezinde, tolyǵymen oryndalyp keledi. Qala irgesindegi Zachagansk, Krýgloozernoe, Jelaev kentterinde jáne Oral qalasyndaǵy 78 kásiporyn-uıymda qoǵamdyq kelisim keńesi qurylǵan.

– Bizdiń jastarymyz óte talantty. Olar osy qabileti men bilimin odan ári damyta berýine biz barlyq jaǵdaı jasaımyz. Urpaqtar sabaqtastyǵy, dástúr jalǵastyǵy úzilmeýi tıis, - dedi óz sózinde óńir basshysy Altaı Kólginov.

Batys Qazaqstan oblysy ákiminiń málimdeýinshe, keńeste kóterilgen máselelerdiń bári de keleshek jumystardy atqarýda eskeriletin bolady. «Munyń bári óńirde ultaralyq, dinaralyq kelisimdi saqtaýǵa qolǵabys etedi. Qoǵamnyń árbir múshesi el azamaty retinde Qazaqstannyń táýelsizdigi men turaqtylyǵyna, beıbitshiliktiń saqtalýyna qyzmet etýi tıis» dep qorytyndylady keńes otyrysyn Altaı Kólginov.

Qazbek QUTTYMURATULY

«Egemen Qazaqstan»

Batys Qazaqstan

Kúnniń mańyzdy jáne ózekti jańalyqtaryn «Egemen Qazaqstan» telegram kanalynan oqyńyz