Mınıstrdiń aıtýynsha, Elbasy alǵa qoıǵan mindetterdi iske asyrý úshin 2019-2021 jyldarǵa arnalǵan respýblıkalyq bıýdjetke qajetti ózgerister engizilgen.
− Memleket basshysynyń Joldaýyndaǵy tapsyrmalardy oryndaý úshin Úkimet tarapynan úsh jyl merzimge 1,288 trln teńge qarastyrylady. Osy merzim aralyǵynda respýblıkalyq bıýdjetten 966,1 mlrd teńge bólinedi, dedi Á.Smaıylov.
Bul qarajat eń tómengi jalaqy mólsherin, óńdeýshi ónerkásip pen eksportty, shaǵyn jáne orta bıznesti, agroónerkásip keshenin damytýǵa, turǵyn úı nesıesiniń qoljetimdiligin arttyryp, turǵyndardyń turmys jaǵdaıyn jaqsartýǵa, bilim berý mekemeleriniń qurylysy men balalardyń qaýipsizdigin qamtamasyz etýge jumsalmaq. Sondaı-aq Qarjy mınıstri eń tómengi jalaqyny ulǵaıtý úshin úsh jylda 288,9 mlrd teńge nemese jyl saıyn 96,3 mlrd teńge qarastyrylyp otyrǵanyn jetkizdi. Qarjy mınıstri keltirgen málimet boıynsha elimizde ortasha eńbekaqy 2019 jyly 9,1 paıyzǵa ósip, halyqtyń naqty tabysynyń ósimi 4,6 paıyzdy quraıdy. Buǵan qosa, aldaǵy úsh jylda shaǵyn jáne orta bıznesti damytýǵa 90 mlrd teńge nemese jyl saıyn 30 mlrd teńgeden qarastyrylsa, agroónerkásiptik keshendi damytýǵa úsh jylǵa 300 mlrd teńge nemese jyl saıyn 100 mlrd teńge bólinedi.
«Nurly jer» memlekettik baǵdarlamasy boıynsha 650 myńnan astam turǵyn úı salý kózdelip otyr, «7–20–25» baǵdarlamasy aıasynda aldaǵy bes jylda 100 myńnan astam otbasy baspanaly bolady. 3 jyl ishinde arendalyq úı qurylysyn ulǵaıtýǵa 30 mlrd teńge bólinedi, osylaısha 250 myńnan astam otbasynyń turǵyn úı jaǵdaıyn jaqsartýǵa múmkindik berilmek. Balalar qaýipsizdigin qamtamasyz etý, sonymen qatar mektep psıhologtarynyń jumysyn kúsheıtý aıasynda 16,8 mlrd teńge, ıaǵnı jyl saıyn 5,6 mlrd teńge jumsalady.
Erkejan AITQAZY,
«Egemen Qazaqstan»
