Aǵymdaǵy jyldyń birinshi jartyjyldyǵynyń qorytyndysy boıynsha Mańǵystaý oblysy men Iran arasyndaǵy jalpy taýaraınalymy 27,2 mln. AQSh dollaryn, onyń ishinde eksport – 4 mln. AQSh doll., ımport – 23,2 mln.AQSh dollaryn qurap otyr. Mańǵystaý óńiri Iranǵa: 4 mln. AQSh dollar kóleminde astyq pen jarmalar, temeki buıymdary, qurylys materıaldary, bolat jáne basqa da taýarlardy eksporttaıdy. Irannan Mańǵystaý oblysyna: kókónister, jemis-jıdekter, aǵashtar, sporttyq qural-saımandar, jıhazdar jáne basqa da taýarlar ımporttalady.
Irandyq delegasııa Aqshuqyr aýylyndaǵy balyq zaýytynda bolyp, Quryq portyn aralap, strategııalyq mańyzy zor nysannyń múmkindigimen tanysty. Quryq porty - elimiz úshin ǵana emes, kóptegen elder úshin de transkaspıı halyqaralyq dáliziniń jáne kólik-logıstıkalyq júıesiniń eń negizgi núktesi.
Mańǵystaý oblysy men Gýlstan provınsııasy arasyndaǵy saýda-ekonomıkalyq baılanystardy damytý maqsatynda bıznes-forým ótti. Onda Mańǵystaý oblysynyń ákimdigi men Gúlstan provınsııasy arasynda, sondaı-aq «Atameken» О́ńirlik kásipkerler palatasy men Gúlstan oblysynyń Saýda-ónerkásiptik palatasy arasynda ózara túsinistik pen yntymaqtastyq týraly eki memorandýmǵa qol qoıyldy.
- Elbasy Nursultan Nazarbav ekonomıkany ártaraptandyrý, shıkizattyq emes sektorǵa tikeleı ınvestısııalar tartý mindetin tikeleı júktedi. Arnaıy ekonomıkalyq aımaqtar ekonomıkany ártaraptandyrýdyń tıimdi jáne pármendi quraly bolyp tabylady. Búgingi «Aqtaý teńiz porty»arnaıy ekonomıkalyq aımaǵynda 500 mln. AQSh dollar somasynda 27 ınvestısııalyq joba iske asyrylýda. Bizdiń óńirdiń klımattyq jaǵdaıy, elektr energııasynyń qosymsha resýrsy úshin kún jáne jel elektr stansııalaryn salýǵa múmkindik beredi. Sondyqtan balamaly energııa kózderin damytý mańyzdy sektor. Agroónerkásip keshenine ınvestısııa salý úshin, atap aıtqanda jylyjaı sharýashylyqtaryn damytýda mol múmkindikter bar. Mańǵystaý óńiriniń geografııalyq jaǵynan qolaıly ornalasýy, baı tarıhı murasy, kórikti jerleri, teńiz aıdyny, uzaq jaǵajaı maýsymy - týrıstik aǵyndy molaıtyp eki el týrızminiń damýyna múmkindik mol, dedi Mańǵystaý oblysynyń ákimi E.Toǵjanov.
Shara barysynda eki eldiń kásipker ókili jáne basqa da mekemelerdiń mamandary kelissózder júrgizdi. Temirjol, áýe jáne avtokólik qatynastary boıynsha ózara is-qımyldardy jolǵa qoıý, Mańǵystaý men Gúlstanda ózara saýda úılerin ashý, Incheburyn t/j beketi aýmaǵynda elevator salý, Incheburyn azat ekonomıkalyq aımaǵyn ashý, sondaı-aq Gúlstanǵa astyqty ýaqytsha kirgizip óńdep, úshinshi elge satý, dándi daqyldar, sonyń ishinde kúrish egý máseleleri qaralyp, bilim, medısına jáne týrızm salalaryndaǵy yntymaqtastyqtyń jaı-kúıi talqylandy. Sondaı-aq, egin, mal jáne qus sharýashylyǵy, tamaq ónerkásibi, ınjenerlik-tehnıkalyq qyzmetter, qurylys ónerkásibi, bıdaı, ósimdik maılaryn óndirý-satý, tehnıka, aǵash ónerkásibi, býyp-túıý ónerkásibi, ken, farmasevtıka, hımııalyq zattar, tabıǵat týrızmi men emdik týrızm salasy talqylandy.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy
