Jıynda sóz alǵan Qytaı memlekettik damý bankiniń atqarýshy vıse-prezıdenti Lıý Szın myrza atalǵan banktiń qarjylyq damý ınstıtýty retinde Qazaqstanǵa erekshe nazar aýdaryp otyrǵanyn jetkizdi.
− 2005 jyly bank Qazaqstanǵa resmı jumys tobyn jibergen bolatyn. 2006 jyly alǵash ret «Moınaq SES» jobasyna qarjylyq qoldaý kórsetti. Osylaısha ekijaqty seriktestik bastaldy. Osy 13 jyl ishinde QMDB Qazaqstan Úkimetiniń jáne QHR elshiliginiń qoldaýymen birneshe memlekettik organdar, qarjylyq uıymdar men kásipkerler ózara tyǵyz dostyq qarym-qatynas ornatty, – dedi Lıý Szın. Onyń aıtýynsha, 2018 jyldyń maýsym aıynyń sońyna deıin QMDB Qazaqstanda jalpy somasy 33,5 mlrd AQSh dollaryn quraıtyn 32 jobaǵa qoldaý kórsetip, 28 mlrd AQSh dollaryn quraıtyn qujattarǵa qol qoıǵan.
− Qazaqstan men Qytaı arasyndaǵy seriktestik «Bir beldeý, bir jol» bastamasy aıasynda belsendi damyp otyr. Aldymyzda úlken múmkindikter kókjıegi ashyldy. Astanadaǵy QMDB ókildigi 2018 jyly «Bir beldeý, bir jol» sammıtinen keıin banktiń shetelde ashylǵan alǵashqy ókildigi. Eki eldiń kóshbasshylary arasyndaǵy kelisimnen keıin ony júzege asyrýǵa naqty sharalar qabyldandy, – dedi QMDB atqarýshy vıse-prezıdenti.
«Astana» halyqaralyq qarjy ortalyǵynyń basqarýshysy Qaırat Kelimbetov óz sózinde Astanada QMDB ókildiginiń ashylýy eki el kóshbasshylary arasyndaǵy kelisimderdi jedel ári tıimdi júzege asyrýǵa múmkindik beretinin jetkizdi.
− «Bir beldeý, bir jol» mańyzdy halyqaralyq bastamasy Qazaqstanda tıimdi júzege asyrylyp jatyr. Prezıdent Beıjińge saparynda Qytaıdaǵy qarjylyq ınstıtýttardyń ókilderimen kezdesip, ózara seriktestik ornatý týraly kóptegen kelisimge keldi. AHQO «Bir beldeý, bir jol» aıasynda jáne EAEO aıasynda Ortalyq Azııadaǵy aımaqtyq qarjylyq hab bolý maqsatyn alǵa qoıyp otyr, – dedi Q.Kelimbetov.
Saltanatty sharada sóz alǵan Ulttyq ekonomıka mınıstri Tımýr Súleımenov 2017 jyly eki el arasyndaǵy taýar aınalymy 33 prosentke kóbeıgenin, osy jyly Qazaqstan men Qytaı birlese ótkizgen iskerlik keńeske 300 kompanııa qatysyp, jalpy somasy 13 mlrd dollardy quraıtyn 40 qujatqa qol qoıylǵanyn habarlady. Onyń aıtýynsha, búginde elimizde Qytaı kapıtalynyń qatysýymen barlyq ónerkásip salasynda 1200 kásiporyn jumys isteýde. Uzaq merzimdi seriktestikke QMDB da óz úlesin qosyp, iri jobalarǵa qarjylaı qoldaý kórsetip otyr.
Aıtýly sharada AHQO men QMDB arasynda ózara túsinistik týraly memorandýmǵa qol qoıyldy. Qujat boıynsha taraptar uzaq merzimdi yntymaqtastyq negizde iri jobalardy júzege asyrýǵa nıetti.
Erkejan AITQAZY,
«Egemen Qazaqstan»
