Tozǵan joldar – tolǵaqty másele

Salynyp jatqan jańa magıstraldar bizdiń elimizdiń barlyq aımaqtaryn ortalyqpen baılanystyrady. Júk tasymaly jedeldep, el arqyly tranzıt kólemi artýda.
Osy qatarda shekaralyq óńirge jatatyn Atyraý oblysy aýmaǵymen ótetin halyqaralyq tranzıttik dálizderdiń jos­par­lanǵan rekonstrýksııasy bo­lashaqta shekaralas memleket­termen kópjaqty yntymaq­tastyq sheńberinde óńirdiń tran­zıttik kúsh-qýatyn artty­ryp, nátıjesinde óńirdiń ekono­mıkalyq damýyna oń áserin tıgizetini sózsiz. 
Biraq «Batys Eýropa – Batys Qytaı» jobasymen salys­tyrǵanda «Aqtóbe – Atyraý – Astrahan» jobasynda eldi mekenderdiń aınalym joldary qarastyrylmaǵan. Osy baǵyt jáne «Atyraý – Oral» avto­mobıl joldarynyń tran­z­ıttik aǵymy Atyraý qala­sy­nyń ishki joldary arqyly, Jyly­oı aýdanynyń ortalyǵy Qul­sary qalasynyń ishimen «Dossor – Qulsary – Aqtaý» joly ótedi. Ol tehnıkalyq stan­­dart­tarǵa saı kelmeıdi jáne jol qaýipsizdigi talaptaryn buzýǵa sebep bolýda. So­nyń sal­darynan oblysta tek 2016-2017 jyldary jáne 2018 jyl­dyń birinshi toqsanynda 74 jol-kólik oqıǵasy tirkelip, 47 adam qaza taýyp, 142 adam túrli jaraqattar alǵan. Aldaǵy ýaqytta jol qozǵalystarynyń qarqyndaýyna baılanysty jol qaýipsizdigi máseleleri qıyndaı túseri sózsiz. 
Taǵy bir kúrdeli másele – «Aqtóbe – Maqat» jol ýchaskesin rekonstrýksııalaýǵa baılanys­ty respýblıkalyq tas jol boıy­men Qyzylqoǵa aýdany jáne ári qaraı Aqtóbe oblysyna baǵyttalǵan Mańǵystaý oblysynan jáne Jylyoı aýdanynan shyqqan avtokólikter Maqat aýdanynyń Dossor aýylyn 260 shaqyrym aınalyp ótýge májbúr bolyp otyr. 
Atalǵan máselelerdi keshen­di túrde sheshý úshin respýb­lıkalyq menshikke berilgen jol jabyndysy tolyqtaı buzylǵan jáne barlyq jerinde qurylymy tozǵan, uzyndyǵy 135 shaqyrym «Qulsary – Muqyr» avtomobıl jol ýchaskesin (jelisin) qaıta qalpyna keltirý qajet. Bul bir jaǵynan, Aqtóbe qal­a­­synan Aqtaý qalasyna deıin­g­i joldy 120 shaqyrym qys­qartýǵa, ekinshi jaǵynan, «Dossor – Qulsary» ýchaskesiniń re­kon­strýksııasyna jáne bólek aınalym joldyń qurylysyna bıýd­jetten qosymsha shyǵyn shyǵar­maýǵa múmkindik beredi. 
Osyǵan baılanysty biz Úkimet basshysy Baqytjan Saǵyntaevtyń atyna saýal joldap, «Aqtóbe – Atyraý – Astrahan» dálizi jobasyn júzege asyrý barysynda Aty­­raý qalasynyń aınalym joly qurylysy jáne Qulsary qala­synyń aınalym jolymen qosa «Muqyr – Qulsary» avtomobıl jolyn rekonstrýksııa­laý múmkindigin qarastyrýdy suradyq. 

Ǵumar DÚISEMBAEV, 
Senat depýtat