Elbasy óziniń «Bolashaqqa baǵdar: rýhanı jańǵyrý» atty baǵdarlamalyq maqalasynda: «Ájeptáýir jańǵyrǵan qoǵamnyń óziniń tamyry tarıhtyń tereńinen bastaý alatyn rýhanı kody bolady. Jańa turpatty jańǵyrýdyń eń basty sharty – sol ulttyq kodyńdy saqtaı bilý», dep atap kórsetti.
Bul rette batyr babalarymyzdyń bıik rýhy halyq, ásirese jas urpaq arasynda patrıottyq órleý týǵyzyp, ult tarıhyna, Otanǵa degen maqtanysh sezimin uıalatýda. Sondaı ultyn ulyq tutatyn, bolmysy batyrlyqpen bite qabysqan tulǵalarymyzdyń biri – Qasym Qaısenov.
Uly Otan soǵysynda teńdessiz erlik kórsetken tulǵa, Qazaqstannyń Halyq Qaharmany Qasym Qaısenov Keńes Odaǵynyń Batyry ataǵyna laıyq edi jáne soǵan usynylǵan. 1943 jyly qyrkúıekte Dneprdiń oń jaǵalaýy úshin bolǵan shaıqasta ol eren erlik jasady, arqyraǵan aryndy ózennen óziniń partızan otrıadymen birinshi bolyp ótip, jaý tylyndaǵy Grıgorevka, Lýkovısy, Zarýbınsy hýtorlaryn tartyp alyp, Qyzyl Armııanyń negizgi kúshteri kelgenshe berispeı, ustap turdy. Alaıda sol qyrǵynda aýyr jaraqat alyp, artynsha Dneprden birinshi bolyp ótkendegi, Býkrın plasdarmyn daıyndaýdaǵy erligi umyt qaldy da, eń joǵarǵy ataq-dárejeler ózgelerdiń qanjyǵasynda ketken. Onyń qujaty araǵa ýaqyt salyp, partızan shtabynyń arhıvinen tabylǵan. Al Q.Qaısenovtiń qaramaǵyndaǵy 13 jaýyngeri Keńes Odaǵynyń Batyry ataǵyn alǵan.
1995 jylǵy 9 mamyrda Elbasy N.Nazarbaev óziniń Jarlyǵymen Qasym Qaısenovke elimizdiń eń joǵarǵy nagradasy – «Halyq Qaharmany» ataǵyn tapsyrdy. Bıyl – Qasym aǵamyzdyń 100 jyldyq mereıtoıy. Qasym Qaısenovteı qaharmanymyzǵa qansha marapat kórsetsek te, kóptik etpeıdi. Joǵaryda aıtylǵandy eskere otyryp, biz Premer-Mınıstr B.Saǵyntaevtan Zaısan shekara otrıadynyń 2017 áskerı bólimine qarasty shekara zastavasyn «Qasym Qaısenov atyndaǵy shekara zastavasy» dep qaıta ataý múmkindigin qarastyrýdy suradyq.
Shyǵys Qazaqstandaǵy shekaralyq zastavaǵa tek osy óńirdiń ǵana emes, búkil elimizdiń maqtanyshy sanalatyn batyr Qasym Qaısenovtiń esiminiń berilýi alda kele jatqan Jeńistiń 75 jyldyǵyna úlken tartý bolar edi. Jáne bul eldiń shetinde, jeldiń ótinde júrip, Qazaqstandaǵy beıbitshilik pen turaqtylyqty, bal bóbekterdiń tynysh uıqysy men kúmis kúlkisin qorǵaǵan sardarlarymyz ben sarbazdarymyzdyń rýhyn kóterip, júrekterine maqtanysh sezimin uıalatary sózsiz.
Baqytbek SMAǴUL,
Májilis depýtat
