22 qazanda Astanada «Rýhanı jańǵyrý» baǵdarlamasyn júzege asyrý jónindegi ulttyq komıssııa men «Jahandaný álemindegi zamanaýı qazaqstandyq mádenıet» jobasyna qatysýǵa nıet bildirgen Qytaı Halyq Respýblıkasynyń «Ulttar baspasy», sondaı-aq Egıpet Arab Respýblıkasynyń Mádenıet jáne bilim ortalyǵy arasynda yntymaqtastyq týraly memorandýmǵa qol qoıyldy.
Kelisim aıasynda seriktester Qazaqstan tarapyna qazirgi qazaq ádebetıetiniń úzdik úlgilerin qytaı, arab tilderine aýdarýǵa, sonymen qatar ony baspadan shyǵaryp, taratýǵa járdemdesedi.
Ulttar baspasy – Qytaı Halyq Respýblıkasynyń aýdarmaǵa mamandanǵan arnaýly memlekettik uıymy. Ol jyl saıyn Qytaıda turatyn 56 etnostyń tilinde jalpy tırajy 20 mıllıon danaǵa deıin mynǵa jýyq kórkem ádebıetti baspaǵa daıarlaıdy. 1953 jyldan beri baspanyń qazaq redaksııasy jumys istep keledi.
Al, Egıpet Arab Respýblıkasynyń Mádenıet jáne bilim ortalyǵy – arab tili men mádenıetin keńinen nasıhattap, Mysyr jáne basqa elder arasynda mádenı-gýmanıtarlyq baılanystardy nyǵaıtýmen aınalysatyn bedeldi uıymdardyń biri. Ortalyqtyń 25 elde ókildigi bar.
Qazaqstan tarapynan memorandýmǵa qol qoıǵan «Rýhanı jańǵyrý» baǵdarlamasyn júzege asyrý jónindegi ulttyq komıssııanyń hatshysy Aıda Balaeva Qazaqstan Prezıdenti N.Á.Nazarbaevtyń bastamasymen qolǵa alynǵan jobanyń aıryqsha mańyzy men joǵary mártebesine toqtaldy. Qazaq prozasy men poezııasynyń tańdamaly jınaǵy osyndaı aýqymda shyǵarylýy alǵash ret. Antologııa BUU-nyń 6 tilinde jaryq kórip, aǵylshyn, arab, qytaı, ıspan, orys jáne fransýz tilderinde sóıleıtin elderge tegis taratylady.
О́z kezeginde QHR Ulttar baspasynyń orynbasary, Gao Lı hanym qytaı taraby basylymnyń sapasyn qamtasyz etý úshin bar bilimderi men tájirıbesin jumsaıtynyna sendirdi. Gao Lı hanymnyń aıtýynsha, Ulttar baspasy úshin álemge áıgili iri baspalarmen birge osyndaı aýqymdy jobaǵa qatysý – úlken mártebe.
Egıpet Arab Respýblıkasy Mádenıet jáne bilim ortalyǵynyń dırektory Hemdan Ibragım antologııany aýdarý, basyp shyǵarý barysynda arab álemi men Qazaqstan arasynda ekijaqty mádenı-gýmanıtarlyq baılanystar nyǵaıyp, Qazaqstan men Egıpettiń yntymaqtastyǵy arta túsetinine senim bildirdi.
