Saıtta sý álemine qatysty jańalyqtardan bólek, ózen-kólder týraly tanymdyq materıaldar, respýblıkalyq mańyzy bar sý nysandary, sonymen qatar sharýa qojalyq basshylary, bilikti sý mamandary, osy salanyń ardagerleri men ekologtar, qoǵam qaıratkerleriniń suhbattary usynylǵan.
«Saıttyń ıdeıasy Aýyl sharýashylyǵy mınıstrligi Sý resýrstary komıtetiniń Tóraǵasy Islam Ábishev myrzaǵa tıesili. Aldaǵy ýaqyt saıt qoldanýshylary elimizdiń ár óńirinde ornalasqan sý qoımalaryn 3D nusqada tamashalaı alady. Kásipkerlerdiń bazasyn daıyndap jatyrmyz. Ol jerde kez-kelgen qoldanýshy ózine qajetti sharýa qojalyǵy týraly aqparatqa qol jetkizetindeı múmkindik jasaımyz. Jyl sońyna deıin 30 000 kásipker týraly málimet júkteledi», deıdi Sý resýrstary komıteti jáne «Qazsýshar» RMK-niń Baspasóz hatshysy Azamat Baıǵalıuly
Sondaı-aq, saıt qyzmetiniń kelesi kezeńinde qazaq tilinde jarııalanǵan barlyq kontent orys, aǵylshyn tilderinde qatar júredi. Jańa jyldan keıin «Sıfrly Qazaqstan» baǵdarlamasy aıasynda elektrondy qujat aınalymy iske qosylady. Osynyń kómegimen elimizdiń ár óńirindegi sharýa qojalyqtary ıeleri sýǵa qatysty operasııalaryn onlaın túrde júzege asyrady.
Baspasóz hatshysynyń aıtýynsha, taǵy bir tyń bastama – kóp uzamaı myńdaǵan sý nysandary beınelengen ınteraktıvti karta jumys isteıdi.
«Ár oblystaǵy sýarmaly jerlerge qatysty málimetterdiń barlyǵy osy kartadan kórinis tabady. jalpy aýyz sý, egin sýǵa qatysty máseleler boıynsha azamattardan aryz-tilekter qabyldanady. Olardyń tikeleı jaýapty oryndarǵa, basshylarǵa jetýine atsalysamyz»,dedi Azamat Baıǵalıuly.
