ATR reıtınginde 71 orynda turǵan jerlesimiz óziniń tusaýkeser kezdesýin Grıgor Dımıtrovqa qarsy ótkizdi. Bul kúnderi álemniń 10 raketkasy atanyp otyrǵan 27 jastaǵy Bolgarııanyń ataqty tennısshisi «Úlken dýlyǵa» týrnırlerinde óreli oıyn órnegimen kózge túsip júrgenin jankúıerler jaqsy biledi. Kezinde ol Ýımbldon dodasy men Avstralııanyń ashyq birinshiliginde jartylaı fınalǵa deıin jetken. ATR týrnırlerinde 8 márte top jardy. Osyndaı myqty qarsylaspen ótken báseke 2 saǵat 23 mınýtke sozylyp, 6:4, 4:6, 6:4 esebimen Mıhaıl Kýkýshkınniń paıdasyna sheshildi.
Ekinshi aınalymdaǵy kezdesýin jerlesimiz Andreı Rýblevqa qarsy ótkizedi. Úzdikter tiziminde 76 orynda turǵan 21 jastaǵy Reseı tennısshisiniń eń úzdik nátıjesi – 2017 jyly Nıý-Iorkte ótken AQSh-tyń ashyq birinshiliginiń shırek fınalyna shyǵýy. Osy jarystaǵy alǵashqy kezdesýinde Rýblev amerıkalyq Denıs Kýdlany 7:6, 6:0 esebimen qapy qaldyrǵan bolatyn.
Ǵalym SÚLEIMEN,
«Egemen Qazaqstan»
