Aýyldyq aýmaqtardy taratý bóliminiń jetekshisi Janar Ahmıevanyń aıtýynsha, byltyr tórt aýyldyń turǵyndary basqa jerlerge kóshirilse, bıyl bolashaǵy buldyr aýyldardyń sany 10 esege kóbeıgen.
«Qazaqstan Respýblıkasynyń ákimshilik-aýmaqtyq ornalasýy týraly» Zańnyń 3-shi baby 4-shi tarmaǵyna sáıkes turǵyndar sany 50-den aspaıtyn aýyldar jaqyn mańaıdaǵy eldi mekenderdiń quramyna qosylady. Oblysta osyndaı 103 aýyl bar. Olardyń 17-i shekara mańynda ornalasqan. Aýylda bir turǵyn qalsa da, elektr qýatynan ajyratylmaıdy», deıdi J. Ahmıeva.
Jergilikti atqarýshy organdar eldi mekenderge áleýmettik-ekonomıkalyq damytý monıtorıngin júrgizip, keleshegi joq aýyldardy anyqtaǵan. Soǵan oraı adamdar sany 10-nan aspaıtyn 38 eldi mekendi taratý jumystary júrgizilýde. Bulardaǵy 153 turǵynnyń úshten biri–zeınetkerler men balalar. Keleshegi joq dep tanylǵan aýyldarda mektep, aýrýhana jumys istemeıdi. 5 aýylǵa aýyz sý tasyp jetkiziledi. 33 aýyl ortalyqtandyrylmaǵan sý júıesin tutynady.
Jýyrda qoǵamdyq keńeste 15 aýyldyń jaıy qaralyp, usynys oblystyq máslıhatqa jiberildi. Solardyń biri Esil aýdany Kalınovka aýylynda 6 adam tirshilik etedi. Kezinde munda 300 turǵyn bolypty. Qyzyljar aýdany Iаnseno aýylynda bir ǵana otbasy tútin tútetip otyr.
Alaıda, adamdar kimniń esebinen kóshiriledi degen saýaldyń basy ashyq kúıinde qalyp otyr. Bul maqsat úshin jergilikti qazynadan qarajat qarastyrylmaǵan. Baspana satyp alý, árli-berli jol shyǵyndaryn kóterýge onsyz da turmysy júdeý, kóńili túsińki turǵyndar qaýqarsyz. Bul mindet aýdandyq ákimdikterge júktelgenmen, olar da sharasyz.
Endigi bar úmit–úkimette. Áıtpese, shyqpa janym shyqpamen ázer kún kórip otyrǵan aýyldyqtar eski jurttyń ornyn sıpap otyra berýge májbúr.
О́mir ESQALI,
«Egemen Qazaqstan»
Soltústik Qazaqstan oblysy
