Ǵıbratty oqıǵaǵa oraı ıen tirese jınalǵan kópshiliktiń ortasynan jalyndap yqsham shapan jamylǵan, saryala qamshy ustaǵan jaýshy balalar shyqty. Qýanysh ala keldi. Sańqyldaǵan únderinen bir jaqsylyqtyń bolaryn sezgendeısiń. Shynynda da, ánshiniń atyn ıelengen kolledj ujymynyń yntymaqty talpynysy talaıdy tánti etkendeı. Mine, bıýsti tumshalaǵan perde etegi túrilgen kezde Alash jurtyna máńgi ólmes rýhanı mura qaldyrǵan Aqan seriniń nur beınesi bultty kúngi jaryq aı tárizdi jarq ete tústi. Án shapaǵatyn, án meıirin shashatyndaı.
Bıýstiń avtory – respýblıkalyq «Shabyt» festıvaliniń laýreaty Renat Ábenov. Qoladan quıylǵan músin Arqanyń aqtańgeri Aqan seriniń tula boıyndaǵy tamasha daryndy, aıryqsha qabiletti pash etip turǵandaı. Qyran qabaqtary jazylyp, keń mańdaıdan órilgen óner qýaty óshpes sáýleni meńzeıdi. Saltanatty rásimde sóz alǵan qarymdy qalamger Tólegen Qajybaı, Kókshetaý qalasy ákiminiń orynbasary Altynaı Ámirenovalar kolledj ujymynyń ónegeli isine rızashylyqtaryn bildirdi. Osy arada atalmysh bilim oshaǵy bıylǵy jyly Aqan seriniń 175 jyldyǵyna oraı jastar arasynda respýblıkalyq aqyndar aıtysyn ótkizgendigin, án baıqaýyn uıymdastyrǵanyn, arnaıy jınaq shyǵarǵandyǵyn aıta ketken lázim. Kishkentaı ǵana oqý ornynyń uly tulǵany ulyqtaýdaǵy ulaǵatty isi ózgege úlgi bolarlyqtaı. Saltanatty rásimde dástúrli ánshi Qajybaı Jahın seriniń «Mańmańger» ánin náshine keltire oryndap berdi.
Baıqal BAIÁDIL,
«Egemen Qazaqstan»
Aqmola oblysy
