Memleket basshysy Nursultan Nazarbaev: «Beıbitshilik eshqandaı baılyqpen ólshenbeıdi. Sondyqtan bitimgerlik mıssııasy – bizdiń syrtqy saıasatymyzdyń basty baǵyty. Qazaqstan qashan da beıbit kelissózderdi júrgizýge jaǵdaı jasaıtyn memleket bolyp qala beredi» degen bolatyn. Qazaqstannyń bitimgerlik bastamalary táýelsizdiktiń alǵashqy jyldarynan bastap-aq beıbit saıasat ustanyp, álemdegi túıindi máselelerdiń sheshilýine tikeleı atsalysyp kele jatqan memleketimizdiń halyqaralyq dárejede tanylýyn jańa sapalyq deńgeıge kóterdi deýge bolady.
Bedeldi halyqaralyq uıymnyń bitimgerlik mıssııany atqaratyn áskerine jasaq qosý isi kez kelgen memleketke júktele beretin sharýa emes. Mundaı mártebe halyqaralyq qoǵamdastyqta bitistirýshi, úılestirýshi retinde moıyndalǵan elderge ǵana artylatyn senim bolsa kerek. Bul oraıda elimizdiń BUU bitimgerlik áskerine Ortalyq Azııadan ásker jiberýshi alǵashqy memleketterdiń biri ekenin de aıta ketken jón.
El sarbazdary ishki shıelenisi órship turǵan memlekette alty aı boıy áskerı qyzmette bolady. Olar Lıvanǵa Úndistannan attanǵan 680 jaýyngerden quralǵan negizgi batalonǵa qosalqy quram retinde qosylmaq. «Shıelenis oshaǵynda sarbazdardy qandaı qaýip-qaterler kútip tur? Olar qarýly qaqtyǵystarǵa qatysa ma dep alańdaýdyń esh reti joq» deıdi jaýapty mamandar. Bitimgerlik batalonynyń sarbazdary qaqtyǵysqa tikeleı qatyspaıdy, kerisinshe, beıbit kelisimniń oryndalýyn baqylap, BUU bitimgershilik saıasatyn júrgizýge atsalysatyn bolady. Aty aıtyp turǵandaı, jaýyngerler onda gýmanıtarlyq kómek kórsetý, jergilikti turǵyndarǵa járdem berý, áskerı bazalardy jáne júkterdi qaraýyldaý syndy beıbit maqsattaǵy tapsyrmalardy oryndaýǵa jumyldyrylmaq.
Áskerılerdiń sapynda áskerı sheni joǵary saqa jaýyngerlermen qatar jas sarbazdar da bar. Eń bastysy, olardyń barlyǵy áskerı biligi jetik óz isiniń sheberleri. Qorǵanys mınıstrliginiń ókilderi sarbazdar bul áskerı qyzmetke óz erikterimen barǵanyn jáne jaýyngerler qatań irikteýden ótkenin aıtady. Lıvan jerinde olarǵa júkteletin operasııalar arnaýly erejege sáıkes júzege aspaq. Barlyq sarbazdar alǵashqy úsh aıda oqý-jattyǵý jumystarynan ótedi. Árbir jaýynger Lıvandaǵy áskerı qyzmeti úshin aı saıyn úsh eselengen mólsherde jalaqy alatyn bolady. Odan bólek BUU tarapynan ár sarbazǵa aıyna 1420 dollar aılyq tólenedi.
«Bul bastama BUU Jarǵysyndaǵy 43 babtyń mazmunyna sáıkes keledi. Uıymǵa múshe memleketter halyqaralyq beıbitshilik pen qaýipsizdikti qoldaý úshin qarýly kúshterdi, basqa da kómek pen qyzmet kórsetýdiń tıisti quraldaryn berýge mindetti. Áskerılerimizdiń BUU mıssııasyna qatysýy halyqaralyq qaýipsizdikti nyǵaıtýǵa aıtarlyqtaı úles qosady. Sondaı-aq halyqaralyq qoǵamdastyqtyń múshesi retinde, onyń ishinde Qazaqstannyń BUU Qaýipsizdik Keńesindegi turaqty emes músheliginiń qorytyndysyn shyǵarý aıasynda da elimizdiń bedelin nyǵaıtady. Ár alty aı saıyn rotanyń jaýyngerlerin aýystyryp turatyn bolamyz, degen bolatyn jýyrda ǵana osy máselege qatysty jasaǵan málimdemesinde Qorǵanys mınıstriniń orynbasary Talǵat Muhtarov.
Bul joly Lıvan jerine jiberilgen 120 jaýynger – bitimgerlik mıssııasyna attanǵandardyń alǵashqy legi. Jaýapty mamandardyń sózinshe, sarbazdardyń kelesi shoǵyry qańtar aıynan bastap daıyndyqtan ótip, sáýirde Lıvanǵa attanatyn bolady. Halyqaralyq qaýipsizdikti nyǵaıtý men qoǵamdy bitimgerlik saıasatqa tartý búginde mańyzdy sıpatqa ıe bolyp otyrǵan máseleniń biri. Táýelsiz memleketimiz jahandyq beıbitshilik máselelerine qoldaý tanytyp, senimdi seriktestik pen berik yntymaqtastyqtyń biregeı ozyq alańyna aınalyp keledi. Bul jaýapty qyzmet óz kezeginde memleketimizdiń Qarýly Kúshterine zor tájirıbe jınaqtap, áskerı mamandardyń jaýyngerlik qabiletterin shyńdaýǵa múmkindik bermek.
Arman OKTIаBR,
«Egemen Qazaqstan»
ALMATY
