«Solnechnyı mır» qoǵamdyq qorynyń negizin Daýn sındromyna baılanysty damý ereksheligi bar balalardyń bir top belsendi ata-ana toby qalap, ortaq problemalarymen bólisken olar keıinirek balalarǵa medısınalyq jáne psıhologııalyq kómek beretin osy ortalyqty ashqan bolatyn. Ár otbasynyń óz problemasymen jeke kúreskennen góri ortaqtasa otyra sındrommen týǵan balalarǵa qoǵamnyń nazaryn aýdaryp, bir jaǵynan bir-birine moraldyq turǵydan qoldaý kórsetýdiń asa qajettigin sezindirgen ortalyq bara-bara júrgizetin jumystarynyń aýqymyn keńeıte tústi. Ata-analarǵa áleýmettik qorǵaý jáne beıimdeý qyzmetteri kýrs retinde ótkizilip, birjolǵy tegin keńes kórsetý qolǵa alyndy. Áleýmettik mańyzy bar osyndaı jumystar atqarýmen birge «Solnechnyı mır» balalardyń damýynda mańyzy bar, olarǵa shattyq syılaıtyn mádenı jáne sporttyq is-sharalar alańyna aınaldy. Máselen «Solnsekross» sharasy aıasynda qazaqstandyq ártister óner kórsetip, balǵyndarǵa baǵa jetpes qýanysh syılaıdy. Ortalyq ashylǵannan bergi bir jarym jylda ońaltý kýrsynan 250 bala em aldy.
Jýyrda «Beeline» kompanııasymen yntymaqtastyqtyń arqasynda ortalyq jumysynda jańa múmkindikter paıda boldy. Osyǵan deıin bir qala aýmaǵynda kómek berip kelgen «Solnechnyı mır» ońaltý ortalyǵynyń mamandary budan bylaı Qazaqstannyń barlyq aımaǵyna keńes berýge múmkindik aldy. «Bul – erekshe bala tárbıelep otyrǵan otbasylarǵa úlken kómek», deıdi «Solnechnyı mır» qoǵamdyq qorynyń quryltaıshysy Marııa Fedorova.
«Sheksiz múmkindikter» jobasyna qatysýshylar tiziminiń tolyǵýy týraly «Beeline Qazaqstan» ókili Raýan Qabdyrahımov «Bul jobamen aınalysyp júrgenimizge tórt jyldan asty. Osy jyldarda Qazaqstannyń barlyq jerindegi mektepter, ońaltý ortalyqtary, kitaphanalar ınternetke qosyldy. Nazarymyzdy aýdarǵan jıyrma bes uıym búginde zamanaýı tehnologııalardyń arqasynda kóptegen jetistikke jetip otyr. Endi «Solnechnyı mır» ortalyǵy da bizben birge. Ortalyqtyń pedagogtaryna, ata-analarǵa taýsylmas tózim men qajyr-qaırat, barlyq balaǵa densaýlyq tileımiz. Internet qosylǵan soń, ortalyqtyń jumysy burynǵydan da jemisti bolatynyna senimdimiz», dedi.
Anar TО́LEÝHANQYZY,
«Egemen Qazaqstan»
