Birqatar elder elektromobılder ınfraqurylymyn damytýǵa, nóldik shyǵyndar boıynsha kólikterdi satyp alýdy sýbsıdııalaýǵa da nazar aýdara bastady. Infraqurylymdy damytý degende, aldymen qalalarda elektrli kólik quraldaryna arnalǵan zarıadtaý stansalaryn ornatý qolǵa alyndy, bul óz kezeginde zarıadtaý stansalarynyń tutynýshyǵa qoljetimdi, yńǵaıly bolýyn qamtamasyz etedi.
Bul bastama bizdiń elimizde de qoldaýǵa ıe. 2014 jyly Memleket basshysy elektrkólikterge arnalǵan ınfraqurylymdy damytýǵa tapsyrma berdi, sondaı-aq osy jyly nóldik shyǵyndaǵy kólikterdi ákelýge qatysty kedendik baj salyǵy alynyp tastaldy.
Aqtaý qalasyndaǵy ýnıversıtet oqytýshylary jasap shyǵarǵan elektromobılderdi zarıadtaý stansalary otandyq óndiristi jáne elektrkólikterge qatysty ınfraqurylymdy damytýǵa negizdelgen. Bul jańalyqpen Aqtaýda Yessenov University qabyrǵasynda ótken
«I Halyqaralyq Esenov oqýlary» barysynda tanystyq. Oqý aıasynda tusaýy kesilgen oqý ordasy bas korpýsynyń aldynda ornatylǵan eki stansanyń tolyq zarıadtaý sıkli úsh saǵatty quraıdy. Al qos elektromobıl ýnıversıtettiń ishki paıdalanýy úshin alynǵan.
Oqý ordasyndaǵy is-sharaǵa 2007 jyly beıbitshilik boıynsha Nobel syılyǵynyń laýreaty, Dúnıejúzilik turaqty damý jónindegi forýmnyń prezıdenti, úndistandyq Radjendra Kýmar Pachaýrı, Malaızııa Pýtra ýnıversıtetiniń Informatıka jáne aqparattyq tehnologııalar fakýltetiniń baılanys tehnologııasy jáne jelisi kafedrasynyń professory Mohamed Bın Otman qurmetti qonaq retinde qatysty. «Rýhanı jańǵyrý» baǵdarlamasy – tapsyrmalardy sheshýge arnalǵan jańa baǵyt» taqyrybynan bastap Mańǵystaý ekologııasyna, munaı-gaz óndirý isine, teńiz sýyn tushytýǵa, sondaı-aq jastar, stýdentter máselesine qatysty san alýan taqyryptardy qamtyǵan konferensııa ýnıversıtet stýdentteri úshin «Yessenov University úzdik startap jobasy» baıqaýymen, sondaı-aq munaıshy-geolog Halel О́zbekǵalıevtiń 90 jyldyǵyna arnalǵan kitaptyń tusaýkeserimen qorytyndylandy.
Bolashaqta jańa jobany respýblıka kóleminde qoldanysqa engizý kózdelip otyr.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy
