Is-sharaǵa Bilim jáne ǵylym mınıstri E.Saǵadıev, «Astana» halyqaralyq qarjy ortalyǵynyń basqarýshysy Q.Kelimbetov, Dúnıejúzilik banktiń Qazaqstandaǵy turaqty ókili A.Braýn, memlekettik organdardyń basshylary, dıplomatııalyq korpýstyń, otandyq jáne sheteldik joǵary oqý oryndarynyń ókilderi, «Bolashaq» stıpendııasy boıynsha oqyp kelgen túlekter qatysty.
Memlekettik hatshy Qazaqstan Prezıdenti Nursultan Nazarbaevtyń forýmǵa qatysýshylarǵa arnaǵan quttyqtaý sózin oqyp berdi. Onda shırek ǵasyrdan beri elimizdiń talantty jastarynyń bilim alýyna arnalǵan «Bolashaq» stıpendııasy dúnıejúzine tanylǵan qazaqstandyq brendke aınalǵandyǵy atap ótilgen. «Búginde baǵdarlama túlekteri bilim berý, densaýlyq saqtaý, mádenıet, ǵylym jáne tehnıka salalarynda júzdegen ǵylymı ázirlemeler men iri jobalardy júzege asyryp, zor jetistikterge qol jetkizýde. Tórtinshi ónerkásiptik revolıýsııa jaǵdaıynda bizdiń aldymyzǵa jańa talaptar qoıylýda. Sondyqtan bolashaqtyqtardyń alǵan bilimi men biligi, álemniń ozyq elderinen alǵan ómirlik jáne kásibı tájirıbesi tıimdi paıdalanylýǵa tıis», delingen quttyqtaýda.
Baǵdarlama iske asyrylyp kele jatqan 25 jyl ishinde 13,2 myń stıpendııa taǵaıyndalyp, ekonomıkanyń basymdyǵy bar sektorlary úshin joǵary bilikti 10,4 myń maman daıarlandy. Qazirgi ýaqytta 1,2 myń stıpendıat bilim alyp jatyr.
Kezdesý barysynda «Bolashaq» halyqaralyq stıpendııasyn júzege asyrý nátıjesi qorytyndylanyp, ony odan ári jetildirý josparlary talqylandy, úzdik bolashaqtyqtardyń oı-pikirleri tyńdaldy.
Forým aıasynda álemdegi 33 eldiń jetekshi 190 ýnıversıteti qatysqan «International Education Fair» kórmesi uıymdastyryldy. Oǵan Djordj Vashıngton ýnıversıtetiniń, Edınbýrg ýnıversıtetiniń, Vıýrsbýrg-Shvaınfýrt qoldanbaly ǵylymdar ýnıversıtetiniń jáne basqa da oqý oryndarynyń ókilderi atsalysýda.
Raýan QAIDAR,
«Egemen Qazaqstan»
