Búginde kóptegen kásipker atalǵan bastamany qoldap, ózderiniń qyzmetkerlerine jalaqy mólsherin arttyrý týraly sheshim qabyldaǵan. Máselen, Qaraǵandy oblysynyń «Mýtlý Eksport» JShS osy jyldyń qazan aıynan bastap zaýyt jumysshylarynyń eńbekaqysyn 34%-ǵa kóbeıtti. «Mýtlý Eksport» JShS kásipornynyń dırektory Dos-Muqasan Táýkebaevtyń aıtýynsha, búgingi tańda jumysshylardyń aılyǵy 120 myń teńgeni quraıdy.
«Biz Elbasynyń eńbekaqyny ósirý, qyzmetkerlerdiń eń tómengi kúnkóris shegin ulǵaıtý jónindegi tapsyrmasyn qoldaımyz. «Mýtlý» kompanııalar toby tehnıkalyq jumysshylar men zaýyttarda jumys isteıtin qyzmetkerlerdiń eńbekaqysyn 34%-ǵa ulǵaıtty. Iаǵnı, eger bizdiń jumysshylarymyz buǵan deıin 90 myńǵa jýyq jalaqy alǵan bolsa, qazan aıynan bastap olar 120 myń teńge kóleminde alady», dedi D.Táýkebaev.
«Mýtlý» kompanııasynyń negizi 1997 jyly qalanǵan. Kompanııanyń negizgi qyzmeti − bıdaıdy satyp alyp, ártúrli suryptaǵy un shyǵarý. Qazirgi tańda kompanııanyń úsh un kombınaty bar. Eksport geografııasy óte aýqymdy, kompanııa ónimderi Qazaqstannyń ishki naryǵynan ózge О́zbekstanǵa, Tájikstanǵa, Qyrǵyzstanǵa, Túrikmenstanǵa, Ázerbaıjanǵa, Aýǵanstanǵa jetkiziledi.
2018 jylǵy 1 qazandaǵy jaǵdaı boıynsha Qaraǵandy oblysynda jalpy 83 249 shaǵyn jáne orta kásipkerlik sýbektisi jumys isteıdi. 2018 jylǵy qańtar-maýsym aılarynda olar shyǵarǵan ónim kólemi 2017 jyldyń sáıkes kezeńimen salystyrǵanda 21,6%-ǵa ósip, 507,4 mlrd teńge quraǵan. Bıylǵy 1 shildedegi jaǵdaı boıynsha bıznes salasynda jumys isteıtinder sany 231 195 adamdy nemese ótken jyldyń 7 aıyndaǵy kórsetkishtiń 105,3%-yn quraǵan. Osylaısha, elimizdiń bıznes-qaýymdastyǵynyń Prezıdent Joldaýyn qoldaýy oblystyń da áleýmettik-ekonomıkalyq damýynan oń kórinis tabady.
Aıta ketken jón, Prezıdenttiń eń tómengi jalaqyny ósirý týraly sheshimi barlyq sala boıynsha túrli menshik nysandaryndaǵy kásiporyndarda jumys isteıtin 1 mıllıon 300 myń adamnyń eńbekaqysyn tikeleı qamtıdy. Budan ózge, eń tómengi jalaqynyń jańa mólsheri búkil ekonomıka aýqymyndaǵy eńbekaqy ósiminiń katalızatoryna aınalady.
Eske sala keteıik, buǵan deıin Premer-Mınıstr B.Saǵyntaevtyń elimizdiń óńirlerine Prezıdent Joldaýyn iske asyrý máseleleri jónindegi jumys saparlary barysynda Shyǵys Qazaqstan oblysynyń kásiporny, «Fırma «Azııa» JShS qurylys kompanııasy 2019 jylǵy 1 qańtardan bastap qyzmetkerlerge eń tómengi jalaqy mólsherin 50%-ǵa deıin kóteretinin málimdegen edi. «Baqyrshyq taý-ken óndirisi kásiporny» JShS da jumysshylarǵa eńbekaqy mólsherin ósirý máselesin qarastyryp jatyr. Al Almaty oblysynda «Almaty boıaýlary» JShS, «Abdı Ibragım Global Farm» JShS, «Jarkent krahmal-sirne zaýyty» JShS málimdegen-tin.
Qaırat ÁBDILDA,
«Egemen Qazaqstan»
