Qalanyń úsh ortalyq kóshesin qaıta jańǵyrtý jáne keńeıtý jobasy aıaqtaldy. Baımuhanov, Vladımırskıı, Taımanov kósheleri keńip, júrgizýshige de, jolaýshyǵa da jaıly jaǵdaı jasaldy. «Atyraýınjstroı» JShS jol jıekterin ornatý, jaıaý júrginshiler joly men drenaj naýalaryn salý, sýarý qubyrlaryn júrgizý, turaqtar jáne oń jaq baǵyttaǵy ótetin joldar salý, aıaldama pavılondaryn ornatý, kóshe jaryǵyn aýystyrý men jol belgilerin salý sekildi jumystardy ýaqytynda jáne sapaly oryndady.
– Jobany iske asyrý joldarda avtomobıl qozǵalysynyń qarqyndy ósýimen, sondaı-aq kólik sanynyń kóbeıýinen týyndady. Únemi kólik keptelisi bolatyn, qozǵalys kezinde qolaısyzdyqtar týyndaıtyn kóshelerdegi qozǵalysty jeńildetý úshin jolaqtardy ulǵaıtý júrgizildi, – deıdi Atyraý qalasy əkiminiń orynbasary Nurlan Taýbaev.
Bir atap óterligi, jol qurylysy kezinde jergilikti asfaltbeton zaýytynyń ónimi qoldanylǵan. Burynǵy drenaj naýalary saqtalyp, jańalary salyndy. Jaýyn-shashyn sýy men erigen sýdyń aǵyp ketýi úshin joldardy boılaı jıyrma tekshe metr jerasty syıymdylyǵy ornatyldy. Jóndelgen kóshelerdiń boıynda jańa turaq alańdary salyndy. Qazir joba aıasynda 23 aıaldama pavılondaryn ornatý jáne kóshe jaryǵyn aýystyrý jumysy júrip jatyr.
Baqytgúl BABASh,
«Egemen Qazaqstan»
ATYRAÝ
