Sharany ashqan Senat Tóraǵasynyń orynbasary Sergeı Gromov Kaspıı teńiziniń quqyqtyq mártebesi týraly konvensııaǵa qol qoıylǵan Kaspıı mańy memleketteri basshylarynyń Aqtaý sammıtiniń qorytyndylaryn Astana joǵary baǵalaıtynyn atap ótti.
Qazaqstan Prezıdenti Nursultan Nazarbaev atap ótkendeı, atalǵan Konvensııa teńiz sýyn, túbin, qoınaýyn, tabıǵı resýrstary men áýe keńistigin qosa alǵanda osy sý aıdynyna qatysty taraptardyń barlyq quqyqtary men mindettemeleri aıqyndalǵan jáne rettelgen «Kaspıı teńiziniń konstıtýsııasy» bolyp tabylady. Sondaı-aq bul qujat teńizdegi quqyqtar men egemendiktiń arajigin ajyratýǵa, qoınaýyn paıdalaný, tranzıt pen tasymaldaý quqyqtaryn júzege asyrýǵa, sý asty qubyrlary men jelilerdi júrgizýge, tabıǵı orta men bıologııalyq resýrstardy qorǵaýǵa baılanysty aýqymdy máselelerdi qamtıdy.
S.Gromov erekshe qujatqa qol qoıý jónindegi kelisimge kelýdegi Reseı men Irannyń úlesin joǵary baǵalady. Ol Konvensııaǵa qol qoıylýy erekshe sý aıdynyna ekijaqty deńgeıde de, kóptarapty sıpatta da beıbitshilik pen ózara tıimdi yntymaqtastyq aımaǵy mártebesin bekitýge múmkindik beretinin atap ótti.
Sóz alǵan Reseı Federasııasy Federaldyq Jınalysy Federasııa Keńesi Agrarlyq-azyq-túlik saıasaty jáne tabıǵatty paıdalaný komıteti tóraǵasynyń orynbasary Sergeı Beloýsov, Iran Islam Respýblıkasy Konsýltatıvtik Keńesi Tóraǵasynyń birinshi orynbasary Masýd Pezeshkıan Konvensııany ýaqytynda ratıfıkasııalaýdyń mańyzy týraly aıtty.
Otyrys barysynda eki eldiń senatorlary men ókilderi Birtutas ekonomıkalyq keńistik aıasynda Mańǵystaý oblysy men Reseıdiń Daǵystan Respýblıkasyn mysal ete otyryp, shekaralyq aımaqtardy damytýdy, Kaspııdegi týrızm, ekologııa men bıoresýrstardy qorǵaý salasyndaǵy yntymaqtastyqty damytý máselelerin talqylady.
S.Gromov pen M.Pezeshkıannyń kezdesýinde parlamentaralyq yntymaqtastyq jáne ekijaqty qatynastardy, onyń ishinde parlamentaralyq únqatysýlardy odan ári nyǵaıtý máseleleri de talqylandy.
Otyrysqa qazaqstandyq senatorlar Jeńis Nurǵalıev, Olga Perepechına, Mıhaıl Bortnık, Ǵumar Dúısembaev jáne Baqtybaı Shelpekov qatysty.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy
