Adymen Qostanaı qalasyndaǵy ortalyq stadıonda «Tobyldyń» «Qyzyl jar» komandasymen kezdesýi ótti. Árıne, aýa raıy fýtbolshylardy da, jankúıerlerdi de ertkelete qoıǵan joq. Olar qara kúzdiń qaqaǵan sýyǵynda kezekti kezdesýin ótkizdi, jankúıerler fýtbol qyzyǵyn tamashalady. «Tobyl» qyzyljarlyqtardyń qaqpasyna úsh dop salyp, tońyp otyrǵan jankúıerelerin «jylytyp» jibergendeı boldy. Aıtpaqshy úshinshi dopty komanda kapıtany, elimizge belgili fýtbolshy Nurbol Jumasqalıev saldy. Bul Nurboldyń bıylǵy ǵana emes, jalpy óziniń fýtbol mansabyndaǵy sońǵy jeńis doby bolyp sanalady. Ol mansabyn búgingi oıynmen aıaqtady.
«Tobylǵa» arnalǵan saltanatta oblys ákimi Arhımed Muhambetov fýtbolshylar men jankúıerlerdi bıylǵy jeńisimen quttyqtady.
«Bul kópten kútken qýanysh edi. Ol úlken eńbektiń arqasynda múmkin boldy. Aldymen fýtbolshylarǵa rahmet aıtamyn, sosyn burynǵy, búgingi jattyqtyrýshylarǵa, qazirgi bas jattyqtyrýshy Marek Zýbaǵa alǵysym sheksiz. Olardyń tynymsyz eńbeginiń, úsh aıǵy jattyǵýdyń, uzaq ushý saparlarynyń qaıtarymy boldy. Ákimshilik tarapynan da fýtbolǵa jasap otyrǵan jaǵdaıdy jankúıerler kórip otyr. Osydan birneshe jyl buryn stadıon kútimsiz, standartqa saı kelmeıtin. Fýtbolshylar turatyn oryn da jaqsartýdy talap etetin. Infraqurylymsyz eshqandaı tabysqa jetý múmkin emes. Sondyqtan biz alǵashqy jyldan-aq qarjyny ınfraqurylymdy jaqsartýǵa jumsadyq, bárin ornyna keltirdik. Búgin ortalyq stadıon tolyq jóndeýden ótkizildi, ÝEFA-nyń barlyq standarttaryna saı keledi. Zatobol kentindegi, Arqalyq, Rýdnyı qalalaryndaǵy stadıondar jańa talappen qalypqa keltirildi. Rýdnyı qalasynda tutas sport keshenininiń qurylysy júrip jatyr, onda da fýtbol alańdary bar. Fýtbol akademııasy jasaldy. Osyndaı jumystar jalǵasyp jatyr» dedi Arhımed Begejanuly.
Qazaqstan fýtbolynyń ańyzy, búgingi Qazaqstan fýtbol federasııasynyń prezıdenti Seıdilda Baıshaqov «Tobyl» komandasynyń múshelerine qola medal tapsyrdy. Saltanatta komanda kapıtany, ataqty fýtbolshy Nurbol Jumasqalıev jankúıerleri men áriptesterin komanda jeńisimen quttyqtady, sonymen qatar óziniń fýtbol mansabyn aıaqtaǵanyn habarlady.
Fýtbol saltanaty estrada juldyzdarynyń ánimen órnekteldi.
Názıra Járimbet,
«Egemen Qazqstan»
Qostanaı
