Qonaqtar aldymen oblys óńirindegi sharýashylyqtar men óńdeý kásiporyndaryn aralady. Olarmen oblys basshylyǵy kezdesip, dóńgelek ústel basynda betbe-bet áńgime júrgizdi.
Amerıkandyq ınvestorlardy negizinen aýyl sharýashylyǵy qyzyqtyrady eken. Dóńgelek ústel basynda áńgimege amerıkalyq delegasııadan et óńdeý men et eksportymen aınalysatyn Tyson Fresh Meat Inc kompanııasynyń, maldy azyqtandyrý men onyń genetıkasymen aınalysatyn Global Beef Investors, jerdi sýlandyrý jabdyqtary men tehnologııasyn óndiretin KRS, VALMONT Irrigation jáne tuqymdy asyldandyrý isin zertteıtin 3rd Millennium Genetics LLC kompanııalarynyń basshylary qatysty.
«Amerıkadaǵy aýyl sharýashylyǵyn tıimdi damytýdyń «qudaıy» sanalatyn osyndaı kompanııalardy Qazaqstanǵa ákelgenime rızamyn. Bul kisiler kompanııalarynyń ónimi jarty álemdi qamtamasyz etedi. Amerıkadaǵy Soltústik Dakotada nebári 700 myń adam turady. Al onyń ishki ónimi 45 mlrd dollardy quraıdy, jyl saıynǵy ósimi 8 prosent. Tabys tek agroónim esebinen túsedi. Onda jumyssyzdyq, kedeıshilik degen uǵym joq. Ortasha jalaqy ortasha sharýashylyqtyń ózinde saǵatyna 25 dollar. Fermer bir myń gektar jerden bir jylda 300 000-350 000 dollar tabys tabady. Onda óńdelmegen ultaraqtaı da jer joq. Bul kisiler Qazaqstanǵa kelýge, ınvestısııa salýǵa kelisti» dedi Erkin Tátıshev.
Oblys ákimi Arhımed Muhambetov Qostanaı oblysynyń ınvestısııalyq áleýeti týraly aıtyp berdi.Oblysta jer de jetedi, logıstıka da bar, óndirgen ónimdi syrtqa shyǵaratyn naryq ta jaqyn. Al amerıkalyq qonaqtar óz maqsattaryn aıtty.
«Biz óte úlken fırmamyz. Bizdegi 6 zaýytta kúnine 28 000 bas mal soıylyp, eti óńdeledi, shoshqa eti 7 zaýytta óńdeledi. Zaýyttar aptasyna 25 mıllıon taýyq etinen túrli azyq pen jartylaı fabrıkattar jasaıdy. Biz 130 000 jumysshy jaldaımyz.Bizdiń Qazaqstanǵa kelip, adamdardy jumyspen qamtamasyz etýimiz jaqsy saıasat bolar edi. Bul úshin Amerıkada birneshe kezdesýler ótkizip, kelisýimiz qajet, bizdiń kelýimiz birden sheshilmeýi múmkin, ýaqyt kerek. Biraq maǵan Qazaqstan unap qaldy, adamdaryna, mádenıetine ǵashyq bolyp qalǵandaımyn» dedi Tyson Fresh Meat Inc kompanııasynyń ókili Garold Dın SANDORSKI.
Oblys ákimi Arhımed Muhambetov amerıkalyqtardyń oblys sharýashylyǵyna ınvestısııa quıýy úshin jergilikti atqarý bıligi tarapynan barlyq qolaıly jaǵdaı jasalatynyn, ol úshin eń bastysy eki jaqty senim kerektigin aıtty. Qalǵan jumystyń barlyǵyn aldaǵy ýaqyt kórsetedi.
Názıra JÁRIMBET,
«Egemen Qazaqstan»
Qostanaı
