Festıval sheńberinde Sh.Aımanov atyndaǵy «Qazaqfılm» kınostýdııasynda jaryq kórgen «Jaýjúrek myń bala», «Anaǵa aparar jol», «Qunanbaı», «Oralman» jáne «Jańǵaq tal» fılmderi kórsetildi. Festıvaldiń ashylý saltanatynda Qazaqstannyń Rýmynııadaǵy elshisi Dáýlet Batyrashev rýmyn aýdıtorııasyn otandyq kınoóndiris ónimderimen tanystyrý sharasy memleketterdiń mádenı-gýmanıtarlyq yntymaqtastyǵynyń damýyna jáne eki eldiń rýhanı jaqyndasýyna yqpalyn tıgizetinin aıtty.
Festıvalge qatysqan Asylhan Tólepov kórermenderge «Jaýjúrek myń bala» fılminiń túsirilýi týraly aıtyp berdi. Akter bul is-shara rýmyn kórermenderine qazaq halqynyń tarıhy, mádenıeti jáne dástúrimen jaqyn tanysýyna múmkindik beretinin atap ótti.
Sondaı-aq festıvalge jergilikti turǵyndar, qoǵam qaıratkerleri, úkimet, iskerlik jáne akademııalyq orta ókilderi, sondaı-aq, Klýj-Napoka qalasynda oqyp júrgen qazaqstandyq stýdentter qatysty. Olar qazaq kınofestıvali qalanyń mádenı ómirinde erekshe qubylys bolǵanyn, bul sharanyń Rýmynııa Birliginiń júzjyldyq mereıtoıy qarsańynda ótip jatqanyn aıtty.
Qazaq kınosynyń festıvali Rýmynııanyń taǵy da bir iri qalasy – Konstansada da ótti. Bul qaladaǵy kórsetilimde rýmyn kórermenderine «Qazaq handyǵy: Almas qylysh», «Stalınge syılyq», «Birjan Sal» jáne «Jat» fılmderi usynyldy.
Konstansa mýnısıpalıtetiniń jáne aımaqtyq ákimshilik ókilderi, eki eldiń halqyn jaqyndastyrý maqsatynda osy tektes mádenı is-sharalardy ótkizýdiń mańyzdylyǵyna mán berdi. Rýmyn mádenıet qaıratkerleri Qazaqstan men Rýmynııa ártisteriniń qatysýymen birlesken qoıylymdar ázirleý týraly usynystaryn ortaǵa saldy.
Otandyq fılmdermen shabyttanǵan rýmyn kórermenderi qazaqstandyq rejısserlerdiń jumysyna joǵary baǵa berip, qazaqstandyq kıno mektebiniń erekshelikterin atady.
Esterińizge sala keteıik, Rýmynııada qazaq kınosynyń birinshi festıvali 2017 jyly qarashada aıynda ótkizilip, ol Qazaqstan men Rýmynııa arasyndaǵy dıplomatııalyq qatynastyń 25 jyldyǵyna oraılastyrylǵan bolatyn.
Aıgúl AHANBAIQYZY,
ALMATY
