Baıqaýda bes nomınasııa bar: fleıta, goboı, klarnet, fagot jáne saksofon. Is-sharany «Batyrhan Shúkenov atyndaǵy Qor» «Bolat О́temuratov Qorynyń» qoldaýymen uıymdastyryp otyr. Eske sala ketsek, «Batyrhan Shúkenov atyndaǵy Qor» qoǵamdyq qory 2015 jyly qurylǵan, 2018 jyldan bastap qordy mýzykanttyń otbasy basqarady. Qamqorshylyq keńeske ánshiniń baýyry Baýyrjan Shúkenov jetekshilik etse, qordyń dırektory bolyp Nargız Shúkenova bekitilgen. Qor mádenıet pen ónerge baılanysty jobalardy júzege asyrady, sondaı-aq Almaty qalasynyń zııatkerlik ortasyn keńeıtip, kórkeıtýge baǵyttalǵan.
Sonymen bıylǵy baıqaýǵa tórelik etetin qazylar alqasynyń quramy da anyqtaldy. Olar: Nıkolas Kraýze – «Jańa Eýropa» orkestriniń bas dırıjeri jáne kórkemdik jetekshisi, Fransııa; Krıstıan Elın – saksofonshy jáne kompozıtor, Germanııa; Nıkolaı Popov – fleıtashy, halyqaralyq baıqaýlardyń laýreaty, P. I. Chaıkovskıı atyndaǵy Úlken sımfonııalyq orkestrdiń oryndaýshysy, Reseı; Akım Mýhatjanov – Astana qalasy ákimdigi Memlekettik akademııalyq fılormonııasynyń úrmeli orkestiriniń bas dırıjeri, QR eńbek sińirgen qaıratkeri; Tańatar Nuraly – goboı klasy boıynsha Qurmanǵazy atyndaǵy Ulttyq konservatorııanyń professory,
Kazaqstannyń eńbek sińirgen ártisi jáne Janat Ermanov – klarnet klasy boıynsha Qurmanǵazy atyndaǵy Ultyq konservatorııanyń professory, Qazaqstannyń eńbek sińirgen qaıratkeri.
Mýzykanttardy irikteý ońaıǵa soqqan joq. Baıqaýdyń birinshi kezeńinde 43 úmitker baq synady, irikteý syny úshin oryndaýshylar aldyn-ala aspapta oınaǵan beınejazbalaryn jiberdi. 32 jasqa deıingi kásibı oryndaýshylar, sondaı-aq kishi jáne joǵary dárejeli mýzykalyq oqý oryndarynyń stýdentteri qatysqan kelesi kezeńge 28-i ǵana jiberildi. Qazylar alqasynyń múshesi Ákim Muhatjanov baıqaýdyń kásibı deńgeıi týraly: «Qatysýshylardyń quramy óte kúshti, meniń oıymsha, baıqaýǵa óz kásibiniń eń úzdik ókilderi qatysyp otyr. Alda áli eki kezeń bar, bul mýzykanttardyń ózderin kórsetý, ártistik, ansamblde jáne soloda oınaý qabiletterin tanytý úshin tamasha múmkindik», – dep túsindirdi.
Baıqaýdyń maqsaty – ulttyq úrmeli aspaptardyń oryndaýshylyǵyna nazar aýdartý. Onyń mańyzdylyǵyn Janat Ermanov ta atap ótti: «О́kinishke qaraı, sonaý 1990 jyldary qaıta qurý bastalǵannan beri ónerdegi kóptegen jarystar joıylyp ketti. Búginde Astanada bir ǵana baıqaý bar, al Qazaqstannyń úrmeli mektebiniń 50 jyldyq tarıhy bar ekenin eskersek jáne stýdentter men jas oryndaýshylar sanynyń jetkilikti ekenin eske alsaq, bul, árıne, tym mardymsyz. Sol sebepti Batyrhan Shúkenov atyndaǵy konkýrs dástúrge aınalsa, mýzykanttarǵa ózderin kórsetip qana qoımaı, jańa kókjıekten kórinýge, kórnekti oryndaýshylardyń aldynda óner kórsetip, baǵasyn alýǵa múmkindik týatyn edi» deıdi.
Baıqaý baǵdarlamasy tórt kúnge josparlanǵan. Alǵashqy kúni, 26 qarashada, Qurmanǵazy atyndaǵy Qazaq ulttyq konservatorııasynyń Úlken zalynyń sahnasynda baıqaýǵa qatysýshylardyń óner kórsetý tártibi anyqtalady.
Ekinshi aınalymda, 27 jáne 28 qarasha kúnderi qatysýshylar ansambldiń (kvartettiń / kvıntettiń) bir bóligi retinde jáne jeke oryndaýda óner kórsetýge tıis. Bul kezeńniń alǵysharttarynyń biri – Qazaqstan kompozıtorlarynyń shyǵarmalaryn oryndaý.
Fınalda mýzykanttar Mosarttyń nemese Glazýnovtyń konsertin oınaýǵa tıis, olardy «Kamerata Qazaqstan» orkestri men osy keshte dırıjer retinde óner kórsetetin Nıkolaı Kraýze súıemeldeıdi. Tanymal otandyq top eki ret – úshinshi kezeńde jáne 30 qarashadaǵy jabylý saltanatyndaǵy gala-konsertte sahnaǵa shaqyrylatyn bolady.
Úrmeli aspaptar oryndaýshylarynyń birinshi respýblıkalyq konkýrsy jeńimpazdarynyń esimderi 30 qarashada jarııalanady. Ár nomınasııada I, II, III dárejeli júldeler, sondaı-aq dıplomanttardyń dıplomdary men marapattary tabystalyp, «Úzdik súıemeldeýshi» anyqtalady. Baıqaýdyń jalpy júlde qory – 5 250 000 teńgeni quraıdy.
Aıgúl AHANBAIQYZY,
«Egemen Qazaqstan»
ALMATY
