Oblys ákimi Nurlan Noǵaev BAQ ókilderine Prezıdent Joldaýynda aıtylǵan máselelerdiń Atyraý oblysynda iske asyrylýy týraly baıandap berdi. N.Noǵaevtyń aıtýynsha, oblysta «7-20-25» memlekettik baǵdarlamasy boıynsha jergilikti turǵyndardan 131 ótinim qabyldanyp, onyń 89-y maquldandy.
– «7-20-25» memlekettik baǵdarlamasy halyq úshin turǵyn úı satyp alýǵa jańa múmkindikter berip otyr. Qazirgi tańda 1 553 mln teńgeniń 131 ótinimi qabyldandy. 1084 mln teńgeniń 89 ótinimi maquldandy. 62 ótinish berýshige turǵyn úı satyp alýǵa 783 mln teńge kóleminde qarajat berildi, − dedi ol.
Qazir aımaqta turǵyn úı sektoryn damytý úshin 3892 páterlik 44 kópqabatty turǵyn úıdiń qurylysy júrgizilýde. Jyl sońyna deıin barlyǵy 2164 páterlik 34 turǵyn úıdiń qurylysy aıaqtalýǵa tıis.
О́ńirde áleýmettik sektordy damytýǵa 93 mıllıard teńge baǵyttalǵan. Jyl sońyna deıin 30 áleýmettik nysan iske qosylady degen jospar bar.
– 9 aı ishinde 724 oryndyq 2 mektep, 1000 oryndyq 5 balabaqsha, 600 adamǵa arnalǵan 2 mádenıet úıi, 1 densaýlyq saqtaý nysany, 500-deı adamǵa arnalǵan 2 deneshynyqtyrý sporttyq kesheni, bir jataqhana, barlyǵy 13 nysan paıdalanýǵa berildi. Jyl sońyna deıin taǵy 1244 oqýshyǵa arnalǵan
6 mektep, 1960 balany qamtıtyn 10 balabaqsha, 700 adamǵa arnalǵan 3 mádenıet úıi, 4 densaýlyq saqtaý nysany, 2 deneshynyqtyrý-saýyqtyrý kesheni, qaladan shyǵa beristerde ornalasatyn 4 stasıonarlyq polısııa beketi men 1 halyqqa qyzmet kórsetý ortalyǵy ashylady, – dedi N.Noǵaev.
Prezıdent Joldaýynda adamdardyń eńbekaqysyn kóterý halyqtyń ál-aýqatyn kóterýge yqpal etetin basty qadamdardyń biri retinde atal-
ǵany belgili. Bul oraıda, Atyraý oblysy boıynsha 2019 jyly 10 myńnan astam adamnyń eńbekaqysyn kóterý josparlanyp otyr eken.
– Memleket basshysynyń Joldaýyn iske asyrý aıasynda aımaqta halyqtyń áleýmettik jaǵdaıyn kóterý jumystary júrgizilip jatyr. 2019 jyldyń 1 qańtarynan bastap 1720 mekemedegi aılyǵy 42 myń teńge bolatyn 10 415 adamnyń eńbekaqysy kóteriledi. Qazirdiń ózinde óńirdegi 21 mekeme qyzmetkerlerdiń eńbekaqylaryn kóterý sharalaryn bastap ketti. Bul mekemelerde jalpy sany 2 587 adam jumys isteıdi,– dedi oblys ákimi.
Bıyl ekinshi jartyjyldyqta aımaqta jańadan 26 494 jańa jumys orny quryldy.
Atyraý oblysy elimizdegi balyq óndirisi jolǵa qoıylǵan aımaqtardyń biri. Oblys ákimi osy baǵyttaǵy jetistikter týraly da baıandady.
Qazirgi tańda eki mekeme toǵandarda qyzyl balyq túrlerin ósirýmen aınalysyp jatyr. Kompanııalardyń biri jylyna 60 tonna balyq pen
1 tonnaǵa jýyq qara ýyldyryq óndirse, ekinshi kásiporyn 100 tonna taýarly balyq eti men 1 tonnaǵa tarta qara ýyldyryq óndiredi. – Bizge balyq aýlaýǵa berilgen kvotany qazirgi tańda balyq salasynda qyzmet atqaryp júrgen 17 mekeme tolyǵymen qoldanýda. Bul 17 kompanııanyń 2-ýinde eýrokod bar, ıaǵnı olar ónimderin Eýropa elderine ótkize alady, – dedi N.Noǵaev. Oblystaǵy Qıǵash, Jaıyq ózenderiniń arnasyn tereńdetý jumystary júıeli júrgizilgendikten, balyq sany da kóbeıipti.
Oblys ákiminiń aıtýynsha, densaýlyq saqtaý salasynda kadr tapshylyǵyn joıý úshin byltyr – 35, bıyl – 53 grant bólinip, jergilikti mektep túlekteri Astana men Qaraǵandydaǵy medısınalyq ýnıversıtetterge bilim alýǵa jiberilipti. Olar tıisti mamandyq alyp shyqqannan keıin mindetti túrde Atyraý óńirine baryp jumys isteýge tıis.
Arnur ASQAR,
«Egemen Qazaqstan»
