– «Qazirgi tańda oblysta avtokólik qurastyrý jumysy qarqyndy damyp keledi. Jyl basynan kólik qurastyrý 15,7%-ǵa deıin ósti. «SaryarkaAvtoProm» JShS alańynda bıyl – 7772 avtokólik, 93 júk kóligi, 76 avtobýs pen mıkroavtobýs shyǵaryldy. Al «AgromashHoldıng» AQ-ta 225 kombaın óndirildi, bul kásiporynnyń ónimdiligi 2,1 esege artyp otyr, – dedi A.Muhambetov.
Sondaı-aq óńir basshysy oblystaǵy agroónerkásiptik keshen salasyna sıfrly tehnologııalar qalaı engizilip jatqanyna toqtaldy. – Qosarlas júrgizý tehnologııalaryn engizý jónindegi tehnıka parki jańǵyrtyldy, janar-jaǵarmaıdy esepke alatyn jáne tehnıkany ornynan aýystyrý esebin júrgizetin datchıkter ornatyldy. Egin shyǵymdylyǵynyń, ylǵaldylyǵynyń, dán bastyrýdyń onlaın monıtorıngi júıesi engizile otyryp, egin jınaý tehnıkasy qaıta jaraqtandyryldy. Janýarlardy chıpteý jáne elektrondy epızootııalyq kartalaryn jasaý tehnologııalary engizilýde, – dedi ol.
Kelesi jyldan bastap oblystaǵy bıýdjetke túsetin júkteme azaımaq. Iаǵnı, ol ortasha eseppen taıaýdaǵy úsh jylda jyl saıyn shamamen 2 mlrd teńgeni quraıdy dep kútilýde.
Memleket basshysynyń Qazaqstan halqyna Joldaýynda aıtylǵan mindetterdi iske asyrý aıasynda Qostanaı oblysynyń sońǵy 9 aıdaǵy jumysyn qorytyndylaǵan aımaq basshysy jumysshylardyń eńbekaqysy týraly sóz qozǵady.
Onyń aıtýynsha, 200-den astam kásiporynda 36 myń jumyskerdiń jalaqysy ósýde. Mysaly, 1 qarashadaǵy kórsetkish boıynsha 180 mekemede 4500 adamnyń jalaqysy kóbeıdi. 1 jeltoqsannan 337 mekemede 7600 adamnyń tabysy edáýir ósetin bolady. Qalǵan mekemelerde de 1 qańtardan bastap eńbekaqyny ósirý josparlanǵan.
Aıta ketý kerek, «Rýhanı jańǵyrý» baǵdarlamasy aıasynda óńirde bıyl somasy 4,2 mlrd teńgeniń 153 áleýmettik jobasy iske asyrylyp jatyr.
Aqmaral AǴZAMQYZY,
«Egemen Qazaqstan»
