Elordamyzdyń 20 jyldyq mereıtoıyna oraı uıymdastyrylǵan Qazaqstan óńirlerindegi Astananyń mádenıet kúnderi aıasynda Almaty, Shymkent, Taraz, Balqash, Qaraǵandy qalalarynda ótken gastroldik sapar qyrkúıek aıynyń 20-sy men qazannyń 16-syna deıin jalǵasty. Gastrol baǵdarlamasyna teatr repertýaryndaǵy eń úzdik qoıylymdar iriktelip alynyp, óńir kórermenderin qýantty. Atap aıtar bolsaq, B.Soqpaqbaevtyń «...Kózime bir kórinseń, bala ǵashyq...» sahnalyq povesi, Ý.Shekspırdiń «Asaýǵa tusaý» komedııasy, M.Levıdiń «Jer men kóktiń arasy» melodramasy, J.P.Pılo, O.Shýltezdiń «Mosart» mıýzıkli, N.Jaqypbaıdyń «Janarymdaǵy jalǵyz áýen» mýzykalyq qoıylymy, Ǵ.Músirepovtiń «Jibek» spektakli jáne baldyrǵandarǵa arnalǵan Iý.Alesınniń «Zolýshka» mýzykalyq ertegisi Ortalyq jáne Ońtústik óńirdiń qalalary kórermenderi men shahar qonaqtarynyń tolassyz qoshemeti men ystyq yqylasyna bólenip qaıtty.
Astananyń 20 jyldyǵyna arnalǵan gastroldik sapar baǵdarlamasy aıasynda Áýlıeata óńiri – kóne Taraz shaharynda dramatýrg Bolat Bekjanovtyń «О́mir» dramasynyń tusaýy kesilip, tuńǵysh ret tarazdyq kórermen nazaryna usynyldy. Ult erteńi men urpaq arasyndaǵy názik tin – tek pen tamyr máselesine tereń úńiltip, zamannyń zapyranǵa toly ashy shyndyǵyn sýretteıtin qoıylymnyń kórermen kóńilin qozǵap, sezimin silkintkeni sózsiz.
Aıta keteıik, «Jibek» mıýzıkli 22 maýsym men 9 shilde aralyǵynda Ońtústik Koreıanyń mádenı astanasy Degý qalasynda ótken HII Degý Halyqaralyq mıýzıkl festıvaliniń (Dimf – daegu international musical festival) arnaıy shaqyrtýyna ıe bolyp, festıval tórinde óner kórsetti. Mıýzıkl janry damyǵan Fransııa, Ulybrıtanııa, Qytaı, Koreıa, Taıvan, Chehııa, Reseı syndy iri memlekettermen ıyq tirestire óner kórsetý jas ujym úshin úlken mártebe ǵana emes, teńdessiz tájirıbe de bolǵany sózsiz. Qazaq eliniń kók týyn jelbiretip, ulttyq klassıkalyq tól týyndymyzdy álemdik arenada jahan kórermenderi nazaryna usynyp, festıvaldiń «Arnaıy dıplomymen» marapattaldy.
Sonymen qatar osy jyldyń qyrkúıek aıynda Mádenıet jáne sport mınıstrliginiń uıymdastyrýymen ótken elordamyz – Astana qalasynyń 20 jyldyq mereıtoıy jáne kórnekti teatr akteri, rejısser, Qazaqstannyń halyq ártisi R.Seıtmetovtiń 80 jyldyǵyna arnalǵan Qazaqstan drama teatrlary festıvalinde de dál osy «Jibek» mıýzıklimen baq synap, sahna sarapshylary men kórermen qaýymnyń qoshemetine bólenip, «Úzdik qoıylym» atalymynda top jaryp, festıvaldyń bas júldesin qanjyǵasyna baılady.
О́tken maýsymnyń jańalyǵyna aınalǵan atalǵan qoıylym Jastar teatrynyń jylashar baǵdarlamasyn da jandandyryp, uzaq ýaqyt úzilisten soń saǵynysa qaýyshar talǵampaz kórermenin tek qana mártebeli teatr óneri syılar rýhanı lázzatqa keneltetine senemiz. Endeshe, teatrǵa asyǵyńyz!
Nazerke JUMABAI,
«Egemen Qazaqstan»
