Oblys turǵyndaryn elektrondy qujatpen qamtý 95,6 paıyz dárejesine jetip qaldy. Bul týraly jýyrda oblystyq densaýlyq saqtaý basqarmasy basshysynyń orynbasary Baıan Býrambaeva aıtty.
– Elektrondy densaýlyq tólqujatynyń kómegimen dárigerler pasıenttiń densaýlyq jaǵdaıy, onyń anamnezi, sozylmaly aýrýlary, preparattardy qabyldaý allergııasy týraly tolyq aqparatqa qol jetkize alady. Kómek kórsetý jeri men medısınalyq uıymdarda paıdalanatyn aqparat júıesine qaramastan adam densaýlyǵy týraly barlyq túıindi málimetter bir bazada jınalady. Nátıjesinde pasıentke dárigerge barýdy aldyn ala josparlaý, elektrondy joldamalar men taldaý nátıjeleriniń esebinen dárigerge barýdyń sanyn 2 esege qysqartý, dáriger pasıenttiń densaýlyǵy týraly aqparatty bir jerge jınaqtaýy jáne dárigerler men ortasha medısına personalynyń eńbegin ońtaılandyrýǵa múmkindik beredi,–dedi ol.
Oblystyq onkologııa ortalyǵy dırektorynyń orynbasary Jandos Ádilhan:
– Elbasynyń Joldaýynda kórsetilgendeı, oblysta onkologııalyq qyzmetti jetildirý maqsatynda júıeli jumys atqarylyp keledi. Qazirgi tańda Qyzylorda qalasynyń sol jaǵalaýynda josparlanǵan onkologııalyq profıldi kópsalaly 300 tósek oryndyq aýrýhananyń jobalyq smetalyq qujattamasyn ázirleýge 150,5 mln teńge qarjy bólinip, jyl sońyna deıin jumys jobasyna memlekettik saraptama qorytyndysy alynbaq. Oblysta onkologııalyq aýrýlardyń aldyn alý, ony emdeýde kóptegen tyń tásilder engizilip otyr. 2016 jyly onkologııalyq ortalyqta pallıatıvti kómek kórsetetin bólimshe, 2018 jyly dıagnostıkalyq palatalar ashyldy. Dıagnostıkalyq palatalar arqyly qysqa ýaqytta kúmándi onkologııalyq aýrýlardy anyqtaýǵa qol jetse, pallıatıvti kómek IV satydaǵy onkologııalyq syrqattardyń tolyq em alýyna jaǵdaı týǵyzdy. Sonymen qatar bıyl oblys ákimi Qyrymbek Kósherbaevtyń qoldaýymen oblystyq onkologııa ortalyǵy Ońtústik Koreıa eliniń jetekshi klınıkalarymen memorandýmǵa otyrdy. Jyl boıyna Ońtústik Koreıa eliniń professorlary men bilikti dárigerleri oblysymyzǵa kelip, naýqastardy qarap, ota jasap, zerthanalyq tájirıbesimen de bólisti, – dedi.
Qazir álemdegi medısına salasyndaǵy jetistikterge Ońtústik Koreıa memleketine basymdyq beriledi. Alyp muhıt jaǵasyndaǵy memlekettiń mundaı tabysqa jetýi ishki básekelestiktiń myqtylyǵynan delinedi. О́ıtkeni mundaǵy aýrýhana, klınıkalardyń deni on, jıyrma jyl buryn jeke qolǵa ótken. Jekelegen ınvestordyń tabysqa jetý quraly – álemdik ozyq medısına ıgilikterine jol ashyp, ózine adamdardy magnıtteı tartýy bolmaq. Dúnıejúzinde Ońtústik Koreıa memleketimen densaýlyq saqtaý salasynda yntymaqtastyq tanytyp, áriptestik baılanys ornatýǵa tyrysyp jatqan elder kóp. Sonyń biri – Qazaqstan.
Básekelestikti arttyrý úshin aýrýhana ataýlyny jeke ınvestorlarǵa bergen memlekettiń medısınadaǵy óz úlesi 5 paıyzdan aspaıdy. Mundaı jaǵdaıda jeke klınıkalardyń bir-birinen qyzmet kórsetý sapasyn arttyratyndyǵy belgili. Máselen, Seýl ýnıversıtetiniń janyndaǵy Býdan gospıtalinde naýqas qaǵazyn toltyrý degen múldem joq. Barlyq derek kompıýterde saqtalady. Ár bólimshe ınteraktıvti taqtalar arqyly syrqat málimetimen qanyǵady. Arnaıy bilezik taǵyp júretin naýqastyń barlyq jaǵdaıy, dári qabyldaýy wi-fi arqyly derekqorǵa tirkeledi.
Shetelden janyna dárý izdep kelgen naýqastarǵa múmkindiginshe óz tilinde qyzmet etedi. Býdan ýnıversıtetindegi professor Sergeı Kımniń kindik qany Qazaqstanda tamǵan eken. Sankt-Peterbýrgte medısınalyq ýnıversıtetti támamdaǵan Sergeı jıyrma jyl buryn Ońtústik Koreıadaǵy oqý ornynyń magıstratýrasyna túsipti. Tarıhı Otanyna oralǵan Sergeı Kım orys tilinen bólek, qazaqshaǵa da jetik.
Sol Sergeı Qyzylordaǵa da koreı dárigerlerimen birge at izin salyp turady. Ol Koreıadaǵy densaýlyq saqtaý salasyndaǵy jetistikterdi jańa tehnologııalardy tez engizýmen qatar, medısınalyq saqtandyrý júıesiniń jaqsy jumys isteýimen baılanystyrady. Ádette, dertti azamat aýrýhanaǵa ketken shyǵynynyń 30 paıyzyna ǵana tólem jasaıdy eken. Al qalǵanyn saqtandyrý qory tóleıdi. Qazaq «aty jaman aýrý» dep atap kelgen qaterli isiktiń barlyq shyǵynyn derlik saqtandyrý qory kóterip alady. Naýqasty saýyqtyrý jóninen álemde jaqsy tabysqa jetip otyrǵan Ońtústik Koreıa dárigerleri óz tájirıbelerin ózge memlekettermen bólisýge kelgende ishtarlyq tanytpaıdy. Dárigerge naýqasty alalaýǵa bolmaıdy. Ol syrqatynan tolyq aıyǵyp ketýi úshin barlyq jaǵdaı jasalýy kerek.
Qyzylorda oblystyq densaýlyq saqtaý basqarmasymen uzaq merzimge memorandýmǵa qol qoıǵan Ońtústik Koreıa eliniń dárigerleri myńdaǵan jandardyń syrqatyn qazaqstandyq dárigerlermen birge emdep keledi. Dúnıejúzilik medısına salasynda ornyn oıyp alǵan koreılermen birge ota jasaýǵa qatysyp júrgen otandyq dárigerler de biliktilik jaǵynan ósip jatyr.
Baqtııar TAIJAN,
«Egemen Qazaqstan»
Qyzylorda oblysy
