Mekteptiń ashylýynda sóz sóılegen agenttiktiń aýmaqtyq departamenti basshysynyń orynbasary Qaırat Baıgebaevtyń aıtýynsha, joǵarǵy oqý oryndarynyń ishinde 26 stýdent atalǵan mekteptiń tyńdaýshysy bolýǵa nıet bildirip, 19-y aldyn-ala konkýrstan súrinbeı ótken.
Memlekettik qyzmettiń bedelin arttyrý maqsatynda qolǵa alynǵan joba aıasynda, stýdentterdi túrli is-sharalar men oqytý kýrstaryn, memlekettik organdarda tájirıbeden ótýin uıymdastyrý jáne úkimettik emes uıymdardyń qyzmetimen tanystyrý kózdelgen.
Bolashaq kóshbasshylar oqýyn aıaqtaǵannan keıin, belgilengen memlekettik mekemelerde bir aı kóleminde is-tájirıbeden ótedi. Atalǵan kezeńderden ótken soń memlekettik qyzmet mektebiniń túlekterine bilim ordasyn aıaqtaǵany týraly arnaıy sertıfıkattar beriledi.
- Stýdentter QR Konstıtýsııasyn, elimizdiń tarıhyn bilý boıynsha test suraqtaryna jaýap berip, áńgimelesý kezeńinen ótti jáne ózderi týraly motıvasııalyq esse jazyp, kabyldaý komıssııasynyń oń sheshimin aldy. Al komıssııa quramyna departament qyzmetkerlerinen bólek, qoǵamdyq uıym ókilderi kirdi. Memlekettik qyzmet mektebiniń tyńdaýshylary memlekettik qyzmetshiniń Ádep erejesin saqtaýy, sybaılas jemqorlyqtyń aldyn-alý, memlekettik kórsetiletin qyzmetter, úkimettik emes uıymdardyń qyzmeti, quqyq qorǵaý organdarynyń jáne sot júıesiniń qyzmetimen tanysý taqyryptarynda oqytylatyn bolady, deıdi Q. Baıgebaev.
QR Prezıdenti janyndaǵy memlekettik basqarý akademııasynyń óńirlik fılıalynda «Memlekettik qyzmet mektebi» tyńdaýshylaryna quqyq qorǵaýshylar dáris oqýdy bastap ketti. Alǵashqy kúni ishki ister departamenti, oblystyq sot jáne oblystyq prokýratýra organdarynyń ókilderi stýdentterdiń suraqtaryna jaýap berdi.
«Adal qyzmet – polısııaǵa mindet» dep sózin bastaǵan Mańǵystaý oblystyq ishki ister departamentiniń kadr jumysy basqarmasy bastyǵynyń orynbasary Serik Molbaev, ishki ister organdarynyń jumysy týraly aıta kele, qoǵamdyq tártip pen qaýipsizdikti qamtamasyz etý baǵytynda atqarylyp jatqan jumystarǵa toqtaldy.
Al, Mańǵystaý oblysy Sottar ákimshisiniń kadr bóliminiń basshysy Qanat Nurqabyluly, sot júıesindegi reformalar, sýdıa bolý úshin qoıylatyn talaptar jáne sottan is-tájirbıeden ótý týraly tolyqqandy aqparat berdi.
Sonymen qatar, Mańǵystaý oblysy prokýrorynyń kómekshisi Serik Ádilov, prokýratýra organdarynyń negizgi mindetterine Konstıtýsııa men zańdardyń ústem turýyn qamtamasyz etý, adamnyń jáne azamattyń quqyqtary men bostandyqtaryn, sondaı-aq qoǵam men memlekettiń zańmen qorǵalatyn múddelerin qorǵaý bolyp tabylatyndyǵy týraly túsinik berdi.
Agenttiktiń aýmaqtyq departamenti basshysynyń orynbasary Qaırat Baıgebaev, memlekettik qyzmet mektebinde ótkizgen stýdentterge teorııalyq bilimderin tájirbıede sabaqtap, paıdaly aqparattar aldy degen senimde ekendigin jetkizip, ozat stýdentterge bolashaqta bilikti «zańger» bolyp shyǵýlaryn tiledi.
Aldaǵy ýaqytta stýdentterge agenttiktiń aýmaqtyq departamentiniń ókilderi dáris oqıtyn bolady.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy
