Oral qalasyndaǵy Dostyq úıinde dóńgelek ústel májilisimen bastalǵan aksııaǵa Batys Qazaqstan oblysy basshylyǵy, halyq Assambleıasy men quqyq qorǵaý organdary jetekshileri jınaldy.
Qazaqstan Respýblıkasy Ishki ister mınıstrligi kadr jumysy departamentiniń basqarma bastyǵy, polısııa polkovnıgi Murat Jaqypbekovtiń aıtýynsha, Qazaqstannyń táýelsizdik jyldarynda quqyq qorǵaý organdarynyń 780 qyzmetkeri qyzmet babynda júrip qaza tapsa, 2378 qyzmetker qylmyskerdi ustaý kezinde jaraqat alǵan eken. Ishki ister bólimderi men Ulttyq ulannyń 1273 ókili qyzmettik tapsyrmalaryn júzege asyrý barysynda kórsetken erligi úshin memlekettik marapatqa ıe bolǵan. Munyń ishinde 130 qyzmetker orden-medaldarǵa qaza tapqannan keıin usynylǵan.
- Erlik umytylmaýy kerek. Búgingi aksııanyń maqsaty – erlik pen batyrlyqty nasıhattaý, jas urpaqtyń boıyna otansúıgishtik sezim men patrıottyq rýhtyń dánegin sebý. Osyndaı sharalardyń arqasynda halyq pen ishki ister organdarynyń arasynda senim kópiri ornaıdy, - dedi óz sózinde Murat Qońyrjanuly.
Árıne, quqyq qorǵaý organdarynyń, sonyń ishinde polısııa qyzmetiniń reformasy – zaman talabynan týyndaǵan aqıqat. Murat Jaqypbekov Prezıdenttiń «Qazaqstandyqtardyń ál-aýqatynyń ósýi: tabys pen turmys sapasyn arttyrý» joldaýynda kórsetilgen tapsyrmalar men mindetterdi júzege asyrýǵa baǵyttalǵan sharalar týraly keńinen aıtyp berdi.
- Búgingi qoǵamda árkimniń óz isimen aınalysýy óte mańyzdy. Qoǵamnyń tynyshtyǵyn, quqyq tártibiniń saqtalýyn qadaǵalaý – ishki ister salasy qyzmetkerleriniń tikeleı mindeti bolsa, polısııa qyzmetiniń materıaldyq-tehnıkalyq jaǵynan tolyq jabdyqtalýy – jergilikti atqarýshy bıliktiń moınyndaǵy másele, - dedi Batys Qazaqstan oblysy ákiminiń orynbasary Ǵabıdolla Ospanqulov.
Jıynda ishki ister organdarynyń jumysyn alǵa bastyryp, materıaldyq-tehnıkalyq bazany nyǵaıtýǵa qosqan úlesi jáne ishki ister bólimi ókilderiniń erligin nasıhattaǵany úshin birqatar adam Qarazaqstan Respýblıkasy Ishki ister mınıstriniń maqtaý qaǵazy men alǵys hatyna ıe boldy. Olardyń ishinde Batys Qazaqstan oblysy ákiminiń orynbasary Ǵabıdolla Ospanqulov, «Nur Otan» partııasy Batys Qazaqstan oblystyq fılıaly tóraǵasynyń birinshi orynbasary Serik Súleımen, Jáńgir han atyndaǵy Batys Qazaqstan agrarlyq-tehnıkalyq ýnıversıteti rektorynyń keńesshisi, aýyl sharýashylyǵy ǵylymdarynyń doktory, Batys Qazaqstan oblystyq polısııa departamenti janyndaǵy konsýltatıvtik-keńes organynyń tóraǵasy Qazybaı Bozymov, aqyn Aqushtap Baqtygereeva bar.
Aksııaǵa qatysýshylar Oral qalasyndaǵy Nazarbaev zııatkerlik mektebinde, №7, 10, 47 mektepterinde bolyp, ustazdarmen, oqýshylarmen kezdesti. Búldirshinderdiń búgingi kúnniń batyrlaryna qoıǵan: «Siz osy erlikti jasaǵan kezde qandaı oıda boldyńyz? Qoryqqan joqsyz ba?» degen shynaıy saýaldaryna jaýap berdi.
«Qazirgi zaman qaharmany» aksııasy Batys Qazaqstan oblysynyń ákimi Altaı Kólginov qatysatyn saltanatty sharamen qorytyndylanady.
Qazbek QUTTYMURATULY,
«Egemen Qazaqstan»
