«Gúlsar» keptershiler klýbyna 30 jyl tolýyna oraı uıymdastyrylǵan kórmege Reseı, О́zbekstan, Qyrǵyzstan jáne Germanııa, AQSh syndy elderinen kógershinniń túr-túri ákelingen. Klýb jetekshisi Baqyt Batekeevtiń aıtýynsha, negizinen Orta Azııalyq kepterlerdi tanytýǵa kúsh salynǵan. Kórme ótkizýdegi maqsat ta osy óńirdegi kepterlerdi álemge tanytý. Kórmege qatysýǵa tek kásibı keptershiler ǵana emes, jas balalardy da shaqyryp, kepter ósirýge áýestenetinderdiń basyn qosý da kózdelgen. Qustyń bul túrin qolda ustaýǵa áýesterdi baǵasy qyzyqtyrary da málim. Kórmege ákelingen qustardyń túrleri de, baǵalary da san alýan.
Eń arzanynyń quny 5 000 teńgeden bastalsa, qymbaty 5 000 000 teńgege deıin barady. Bul oraıda, árıne tuqymy men jasyna erekshe mán beriledi. Kóńilinen shyqqan qus baǵasynyń qymbattyǵyna qaramaı alatyndar da az emes. Keptershilerdiń aıtýynsha, qustyń tumsyǵy men tyrnaǵyna, turqy men jasyna erekshe mán beriledi.
Shymkent halqy túsi qubylyp turatyn, kózi ashyq kók tústi ádemi «Gúlbadam» atty kepterlerge kóp qyzyǵady eken. Kógershindi qosymsha tabys kózine aınaldyrǵandar da barshylyq. Mysaly, 80 qus baptap otyrǵan Arys qalasynyń turǵyny E.Pernebaı kórmege 20 kógershin alyp kelipti. Qustary arqyly tapqan eń kóp tabysy - 600 myń teńge bolypty. Muǵalimniń aıtýynsha, negizgi tabystan bólek kógershin asyraý arqyly 1 000 000 teńge kóleminde qarjy tabýǵa bolady.
Aıta ketelik, Shymkentte ótken kórmege eń qymbat - 5 000 000 teńgege baǵalanatyn kógershin de ákelingen. Kelýshiler elimizdiń túkpir-túkpirinen jáne alys-jaqyn shetelderden jetkizilgen kepterlerdiń 500-den astam túrin tamashalaý múmkindigine ıe boldy. Sondaı-aq ózderine unaǵan kepterlerdi satyp alǵandar da az bolmady.
Ǵalymjan ELShIBAI,
«Egemen Qazaqstan»
Shymkent
