Sýretti túsirgen: Rýfına Torpısheva
Bul kúnderi ýnıversıtettiń Sáýlet-qurylys fakýlteti bakalavrıat, magıstratýra bilim baǵdarlamasy boıynsha bilim beredi. Buǵan deıin «О́ndiristik jáne azamattyq qurylys», «Beton jáne temirbeton óndirisi» salasynda mamandar daıarlap keldi.
Qazir stýdentter qurylys, sáýlet, dızaın, beıneleý óneri jáne syzý, qurylys materıaldaryn, buıymdaryn jáne qurastyrylymdaryn óndirý, Qorshaǵan ortany qorǵaý jáne ómir tirshiliginiń qaýipsizdigi, kásiptik oqytý, kólik qurylysy, qurylys salasynda ǵylymı-teorııalyq jáne tájirıbelik jumystar boıynsha daıyndalýda.
Oqý-tárbıe úderisi О́nerkásiptik, azamattyq jáne kólik qurylys, Arhıtektýra jáne dızaın, Kásiptik oqytý jáne qorshaǵan ortany qorǵaý kafedralarynda júrgiziledi.
Mysaly, «О́nerkásiptik, azamattyq jáne kólik qurylysy» kafedrasynda «О́nerkásip qaldyqtaryn joıýdyń ekologııalyq aspektileri», «Juqa qabyrǵaly qurylymdardy esepteýdiń sandyq ádisteri», «Ártúrli deńgeıdegi kóp qabatty ǵımarattardyń qabyrǵalaryn zertteý jumysy», «Qıyn ekologııalyq jaǵdaılarda shókpeli negizdikti paıdalanatyn ǵımarattar irgetastarynyń áser etýi», «Sýmen shógý qaýipsizdigin baǵalaý» sııaqty taqyryptarda stýdentter ǵylymı-jumystar jazýda.
Fakýltettegi «Kólik qurylysy» mamandyǵyna bilim alǵan stýdentter óńirdegi Maı razezi men Degelen stansasy, Qurkól-Kóktóbe aralyǵyndaǵy bir jolaqty joldy eki jolaqty etip salý júmystaryna, oblys ortalyǵy Aqsý - Kóktóbe - Kýrchatov qalasy aralyǵyndaǵy respýblıkalyq joldyń uzyndyǵy 10,69 shaqyrym bóligin qaıta salý, oblys ortalyǵyn batys jaǵynana aınalyp ótý sııaqty jobalaryna úles qosty.
Oqý ornynyń baspasóz qyzmetiniń málimetinshe, Barbara Marıno bir aıdyń ishinde О́nerkásiptik, Azamattyq jáne kóliktik qurylys kafedrasynyń stýdentterine «О́zen jaǵalaýyndaǵy tabıǵat qorǵaý nysandary men menedjment» taqyrybynda dárister oqıdy. Bul taqyryp Ertis ózeni jaǵasynda ornalasqan bizdiń óńir úshin de mańyzdy.
Al, sheteldik professordyń aıtýynsha, álemdegi jaǵalaýlardyń 70 paıyzy tabıǵı qubylystardyń áserinen zardap shegýde.
-Tabıǵat qorǵaý nysandarynyń ınjener-qurylysshysy tolqynnyń bıiktigin, jeldiń kúshin, aǵymdardy, jaǵadaǵy errozııa qarqynyn, jaǵanyń tereńdigi men bolashaq nysannyń tereńdigi, sondaı-aq, qurylys materıaldarynyń baryn da (tas, beton nemese kum) eskerý kerek. Eskeretin jaıttar óte kóp, - deıdi Barbara Marıno.
Sheteldik maman Ertis ózeniniń jaǵasyndaǵy «Qaz qonaq» paleontologııalyq eskertkishin sý shaıýdan qorǵaý máselesine qatysty pikirin de bildirdi. Professor jaǵany betonmen bekitý tıimdi ekenin aıtady. Sebebi qumnan jasalǵan nysandar aǵynǵa tótep bere almaýy múmkin.
Farıda BYQAI
«Egemen Qazaqstan»
PAVLODAR
