Halyqaralyq shara barysynda Jambyl oblysynyń da týrıstik áleýeti men nysandary tanystyryldy. Jańa nysandardy qabyldaý boıynsha sheshim komıtettiń sessııasynda qabyldanady eken. Al halyqaralyq komıssııa quramynda álemniń seksen eliniń sarapshylary boldy. Halyqaralyq komıtet negizinen týrıstik tartymdy nysandardy tanytý máselelerimen aınalysady.
Túrkııa eline barǵan Jambyl oblystyq týrızm basqarmasynyń ókilderi qazylar quramynyń aldynda Áýlıeata óńiriniń týrıstik áleýetke ıe ekendigin dáleldeı bildi. Jambyl óńiriniń ǵana emes, búkil qazaq eliniń tarıhı-mádenı qundylyqtarynyń qataryna jatatyn ortaǵasyrlyq «Aısha bıbi» kesenesi men «Aqyrtas» saraı kesheni oblystyq basqarma qyzmetkerleriniń tanystyrýynan keıin sarapshylardyń qoldaýymen álemdegi erekshe týrıstik tartymdy nysandardyń tizimine endi.
Nátıjesinde sol sanatty resmı naqtylaıtyn arnaıy sertıfıkat tapsyryldy. Endi bul nysandardy kópshilikke áleýmettik jeliler arqyly tanymal etý maqsatynda «World List – Tourist Attraction» belgisin (logotıp) paıdalanýǵa ruqsat etiletin bolady.
«Sessııa kezinde mamandardyń «Aısha bıbi» kesenesi men «Aqyrtas» saraı keshenin moıyndaýy – týrızm salasy boıynsha óńirimizde atqarylyp jatqan jumystarǵa berilgen joǵary baǵa», deıdi Jambyl oblystyq týrızm basqarmasynyń basshysy Qarlyǵash Aralbekova.
Hamıt Esaman,
«Egemen Qazaqstan»
Jambyl oblysy
