Qazaqstan baspasóz klýbynyń málimetinshe, irikteý kezinde respýblıkalyq jáne óńirlik BAQ-tan 50-den asa ótinim kelip túsken. Qazaqstandyq medıa sarapshylarynan turatyn Qamqorshylar keńesi ótinimderdi baǵalap, eń laıyqty degen úmitkerlerdi iriktep shyqty. Naryqtaǵy jumys tájirıbesi, saıttaǵy kúndelikti jarııalanymdar sany, jarııalanymdarda dinı jáne qylmystyq taqyryptardyń bolmaýy syndy ólshemder boıynsha baǵalaý júrgizildi.
«Uzaq ýaqytqa sozylǵan qyzý talqylaýdan soń, Qamqorshylar keńesiniń músheleri daýys berý arqyly jobaǵa qatysatyn 25 onlaın-basylymdy anyqtady. Bul basylymdar tek Astana men Almatydaǵy ǵana emes, sonymen birge óńirlerdegi ártúrli taqyrypta, baǵytta, ártúrli tilde shyǵatyn, ártúrli aýdıtorııamen jumys jasaıtyn BAQ bolyp tabylady. Tańdap alynǵan BAQ Qaznettiń jaǵdaıyn kórýge múmkindik beretin qazaqstandyq onlaın-medıanyń kesindisi bolyp otyr. Jobaǵa qatysý arqasynda olar óz aýdıtorııasyn jaqsy túsinip, onymen jaqsyraq ózara árekettesip, sáıkesinshe jarnama berýshilerdi keńinen tartyp, kiris kózin arttyrýǵa múmkindik alatyndyǵyna senimdimin», dep atap ótti jobanyń Qamqorshylar keńesiniń tóraǵasy Mıhaıl Dorofeev.
Baıqaý fınalyna shyqqan BAQ tizimimen myna jerde tanysa alasyzdar. 21 qarasha kúni Almatyda Qazaqstandyq BAQ naryǵyn damytý máselelerine arnalǵan XI «Media Quryltaı 2018» respýblıkalyq konferensııasy aıasynda medıa qaýymnyń Chartbeat ókilderimen kezdesýi ótedi. Irikteýden ótken 25 onlaın-basylym endi Ortaq eseptegishti (panel) quryp, osynyń arqasynda jarnama berýshiler saıttyń tanymaldyǵy jaıly senimdi aqparat alatyn bolady. Joba qatysýshylary Ortaq eseptegishte qandaı kórsetkishterdiń kórsetiletinin daýys berý arqyly ózderi sheshedi.
