Qazaqstan Respýblıkasy Prezıdenti N.Nazarbaevtyń Qazaqstan halqyna jyl saıynǵy Joldaýy elimiz úshin mańyzy zor oqıǵa sanalady. 2018 jylǵy 5 qazandaǵy Joldaýynda Memleket basshysy medısınalyq qyzmet sapasy halyqtyń áleýmettik kóńil-kúıiniń asa mańyzdy komponenti bolyp sanalatyndyǵyn atap ótti.
Bizdiń «Ulttyq neırohırýrgııa ortalyǵynda» Joldaýda aıtylǵan negizgi tapsyrmalar talqylanǵan otyrys ótkizilip, halyqqa kórsetiletin medısınalyq kómektiń sapasyn joǵarylatý maqsatynda 2019 jyly ortalyqta atqarylatyn birqatar jumys jospary saraptaldy. О́ıtkeni aldaǵy jyly klınıkada mańyzy men máni astasyp jatqan jańa tehnologııalardy engizý josparlanýda. Olardyń qatarynda ortalyq júıke júıesi aýrýlaryn steretaksısti qoldanýmen gamma pyshaq qurylǵysynda radıohırýrgııalyq emdeý epılepsııa kezinde hırýrgııalyq aralasýlar aýqymyn ulǵaıtý mı baǵany isikteriniń stereotaksııalyq bıopsııasy syndy aýqymdy, ári halyqqa óte qajet tehnologııalar bar.
Ortalyq júıke júıesi aýrýlaryn steretaksısti qoldaý arqyly Gamma pyshaq (Gamma Knife) qurylǵysynda radıohırýrgııalyq emdeýdi engizý mıdyń isikteri men zaqymdanǵan tamyrlaryn emdeýge múmkindik beredi. Atalǵan qondyrǵyny qoldanýdyń máni mı isikteri men qantamyr patologııalaryn hırýrgııalyq aralasýlarsyz, radıohırýrgııalyq gamma-sáýlelendirý jolymen emdeýden turady. Bul pasıentter úshin óte tıimdi ári qaýipsiz sanalady. Osy ádispen bir naýqasty emdeý shetelde shamamen 20-50 myń eýro turatyn bolsa, al bizdiń ortalyqta mundaı em júrgizýdi aıtarlyqtaı arzan etý josparlanyp, sonymen qatar ony júzege asyrý kvota sheńberinde qarastyrylmaq. Búgingi tańda «Gamma-pyshaq» neırohırýrgııalyq tájirıbedegi radıohırýrgııanyń joǵary dáldiktegi «altyn» standarty bolyp otyr.
Medısınalyq qyzmetter sapasyn jaqsartý boıynsha júrgiziletin jumys aıasynda ortalyq árbir úsh jyl saıyn medısınalyq kómek sapasynyń joǵary standartyn rastaıtyn JCI Halyqaralyq birikken komıssııasynyń sertıfıkattaýynan tabysty ótip keledi. Alda taǵy bir osyndaı synnan ótý merzimi taıanýyna baılanysty JCI Halyqaralyq birikken komıssııasynyń sertıfıkattaýynan qaıta ótýge oraı 2019 jylǵa úlken jumys aýqymy josparlanýda.
Buǵan qosa, ortalyqta klınıkalyq jumystan bólek ǵylymı jáne bilim berý qyzmeti biriktirilgenin de atap ótken jón. Jyl saıyn ortalyq bazasynda 1500-den asa maman, sonyń ishinde oblys aımaqtarynyń dárigerleri de qaıta daıarlaý men jumys ornynda tájirıbeden ótip, biliktiligin arttyrady. О́ıtkeni aımaqtarda eńbek etetin mamandardyń biliktiligi tómen deńgeıde bolsa óńirlerge medısınalyq tehnologııalar «transfertin» júzege asyrýda qıyndyqtar týyndaıdy. Al qaıta daıarlaýdan ótken mamandar medtehnologııalardy oblystarǵa transfertteýdiń bir kepili. Sonymen birge asa mańyzdy baǵyttyń biri neırohırýrgııa jáne nevrologııa boıynsha rezıdentýra tyńdaýshylaryn daıarlaý jumysy jolǵa qoıyldy. Bizdiń klınıka, áleýetinde ǵylym men tájirıbeniń ózekti taqyryptaryna arnalǵan sheber-synyptar men kezdesýleri, jas ǵalymdar konferensııasyn júıeli túrde ótkizýge múmkindigi barlyǵy aıan. Bul jas ǵalymdar úshin taptyrmas alań dep esepteımiz.
Joldaýda «Osyǵan deıin jasalǵan kardıologııalyq jáne neırohırýrgııalyq klasterlerdiń tájirıbesin paıdalanyp, 2019 jyly Astanada Ulttyq ǵylymı onkologııalyq ortalyqtyń qurylysyn bastaý kerek» dep kórsetilgendeı, biz ortalyqta qalyptasqan emdeý jumystary, ǵylymı izdenister men jańa tehnologııalardy engizý arqyly adam densaýlyǵyn saqtaýda atqarylǵan isimizben bólisýge árkez daıarmyz.
Serik AQShOLAQOV,
Qazaqstannyń Eńbek Eri,
«Ulttyq neırohırýrgııa ortalyǵy» AQ Basqarma tóraǵasy
