Aqtóbe oblysyndaǵy jylyjaı, mal bordaqylaý, olardyń ónimderin óńdeý jáne ótkizý, sonyń ishinde eksportqa shyǵarý tájirıbelerimen tanysý barysynda «Izet Greenhouse» jylyjaıynda, «Aıbek» aýylsharýashylyǵy óndiristik kooperatıvinde, «Raıymqul» sharýa qojalyǵynda, 13 myń bas sıyr ustaýǵa arnalǵan «Alǵa mal bordaqylaý» jáne «Alǵa et óndirý» keshenderinde bolyp, eńbek ujymdarymen kezdesti. Kásipkerlermen pikirlesý kezinde memleket tarapynan qoldaý, ákimshilik kedergiler, eksportqa shyǵarýda týyndap otyrǵan máseleler, jumys qolynyń jetispeýshiligi týraly usynystar aıtyldy.
S.Eńsegenov sapar aıasynda Atyraý oblysy, Isataı aýdany Janbaı aýyldyq okrýgine qaraıtyn Qyztýǵan ýchaskesindegi balyq ónimin óńdeý jáne qaıta óńdeý kásipornynda da boldy. 12 saǵatta 3 tonna balyq ónimderin óńdeıtin «Shaǵala Atyraý» kásipornynyń basshysy Abdolxasan Uǵybaı óndiristiń ekonomıkalyq jaǵdaıymen tanystyra kelip, Atyraý oblysy ákiminiń qoldaýymen «Jaıyq» MО́B mekemesiniń elektr jelisine qosylyp jaryq alyp otyrǵanyn aıtty. Sondaı-aq «QazAgro» AQ arqyly jabdyqtar tolyq alynyp, qurastyrylyp ornatylǵan, alaıda qazirgi ýaqytta ósimin qosqanda mekemeniń 106 mıllıon teńge bereshegi bar. О́ndiris iske qosylǵanda 80 adam turaqty jumysqa alynady, deıdi kásipker.
Biraq kásiporyn iske qosylmaı tur. Onyń sebepteri: balyq aýlaýǵa lımıt joq (bul jerde obektıvti sebepter bar), Jaıyq ózeni boıyndaǵy bólinip qalǵan kólshikter taýarly balyq ósirý úshin berilmeı otyr, memleket esebinen ınvestısııalyq sýbsıdııalaýda sheshilmeı turǵan máseleler bar. «Mundaı kedergiler iske degen qulshynysty sý sepkendeı basady eken, biraq úmitim úzilgen joq», degen kásipker jumysyn jalǵastyrýda. Shaǵyn kásiporyn, turaqty jumys orny ashylǵanda memlekettik organdar tarapynan naqty qoldaý bolsa jumysy jandanyp ketetini, al sózbuıdalyqqa salynsa, kásipkerlik salasy eshkimnen qoldaý tappasa, jabylyp qalatyny aıtyldy.
