Shetelde tegin bilim alýǵa nıetti atyraýlyqtar úshin jaqsy múmkindik bar. Oblys ákimdigi men «Halyqaralyq baǵdarlamalar ortalyǵy» AQ-tyń uıymdastyrýymen Atyraýda 12-13 qarashada «International Education Fair» sheteldik joǵary oqý oryndarynyń iri kórmesi ótýde. Munaıly aımaqqa álemniń 40 elinen 200 ýnıversıtettiń ókilderi – «Halyqaralyq baǵdarlamalar ortalyǵy» AQ-tyń seriktesteri kelmek. Sharada qazaqstandyqtardyń shetelde tegin bilim alýlary úshin 20 myń grant usynylady. «Halyqaralyq baǵdarlamalar ortalyǵy» AQ prezıdenti Janbolat Meldeshovtiń aıtýynsha, kórmede sheteldik joǵary oqý oryndarynyń ókilderimen tikeleı sóılesýge, shetelde tegin bilim alý týraly bilýge, sondaı-aq bilim berý salasyndaǵy máseleler boıynsha kásibı keńes alýǵa bolady. Sarapshylardan granttar men stıpendııalar týraly aqparat alýǵa, kórmede qoljetimdi arnaıy usynystarǵa qatysyp, tanymal halyqaralyq emtıhandardy tabysty tapsyrýdyń basty qupııalary týraly bilýge de múmkindik bar.
– «International Education Fair» halyqaralyq bilim berý kórmesi Atyraý oblysynyń túlekteri úshin óte ózekti. О́ıtkeni bizdiń óńirimiz belsendi qarqynmen damyp keledi, bul jóninde áleýmettik-ekonomıkalyq damý kórsetkishteri boıynsha aıtýǵa bolady. Búginde eńbek naryǵynda shet tilderin biletin jáne sheteldik tájirıbesi bar keń beıindi mamandar suranysqa ıe. О́ńirdiń odan ári órkendeýi úshin bizge myqty mamandar qajet. Sondyqtan da Atyraýda halyqaralyq bilim kórmesin ótkizý týraly sheshim qabyldandy, – deıdi oblys ákiminiń orynbasary Nursáýle Saılaýova.
Elbasy 5 qazandaǵy Joldaýynda 2019 jyldy Jastar jyly dep jarııalaǵan bolatyn. Atyraý aımaǵynda Jastar jylyna daıyndyq sharalary bastalyp ketti. Bul shara da el erteńiniń keleshegi kemel bolýy jolyndaǵy bir mańyzdy qadam bolary anyq.
Baqytgúl BABASh,
«Egemen Qazaqstan»
ATYRAÝ
