Oqıǵa bylaı bolypty. Aýdan turǵyndary Pavel Lıgostaev jubaıy Salaýat Tabysbaeva jáne dosy Bekbolat Tekenevpen birge Novo-Polıakovka aýylynan 20 shaqyrym jerdegi omartaǵa baryp, bir qonyp, tańerteń jaıaýlap jolǵa shyǵady. Altaıdyń aýa-raıynyń kúrt qubylatynyn bilse de, eshteńeden seziktenbeı alańsyz kele jatady. Arada bir jarym saǵattaı ýaqyt óter-ótpeste boran soǵyp, úsheýi adasyp ketedi. Qoldarynda balta men uıaly telefonnnan basqa túk joq. Degenmen uıaly telefondary kádege jarap, aq tútektiń arasynda 112 nómirine qońyraý shalyp, adasyp ketken jerdi shamalap aıtyp úlgeredi. Adasqandardy izdeýge Novo-Polıakovka aýylynyń ákimi Serjan Baıbosynov, aýyldyq okrýgtiń mamany Ashat Rahımov, júrgizýshi Damır Áýbákirov, ýchaskelik polısııa qyzmetkeri Radmır Butabaev, feldsher Natalıa Darkımbaeva jáne Ognevo aýylynyń turǵyndary Aıtqazy Qustybaev pen Serik Altynov attanady. Qysqasy, olar adasqan úsheýdi túngi saǵat 1 shamasynda bir-aq tabady. «Keshki saǵat altylarǵa qaraı jel saıabyrsydy. Qarańǵy túsip, qar jaýdy. Bizdi qasqyr torýyldap júr eken. Shoshytý úshin qatty aıǵaılap, jaqyndap qalǵan kezde qolshamnyń jaryǵyn túsirip otyrdyq. Eń bastysy, bizdi izdep tabady degen úmitimizdi úzbedik. Ásirese jubaıymdy qatty ýaıymdadym. Ol barynsha shydaýǵa tyrysty, biraq bizdi taýyp alýǵa bir saǵattaı ýaqyt qalǵanda qaljyrap, uıqysyrap ketti. Baǵymyzǵa oraı, izdeýge jergilikti jerdi jaqsy biletin, buǵan deıin de talaı adamdardy qutqaryp júrgen Aıtqazy Qustybaev shyǵypty. Novo-Polıakovka ákimi Serjan Baıbosynov, Aıtqazy Qustybaev jáne Serik Altynov úsheýi atpen júr eken, bizdi birinshi tapqan solar. Dál sol kezde uıaly telefonymyz da sóndi. Azamattarǵa aıtar alǵysymyz sheksiz», - deıdi bir ajaldan aman qalǵan Pavel.
Esterińizge sala keteıik, osy jyly kóktemde bolǵan sý tasqyny kezinde Zyrıan aýdany ákiminiń orynbasary Janna Asqarqyzy turǵyndardy qutqarý úshin óz ómirin qaterge tikken bolatyn.
Azamat QASYM,
«Egemen Qazaqstan»
Shyǵys Qazaqstan oblysy, Katonqaraǵaı aýdany
