Forým jumysyna Prezıdent Ákimshiliginiń ókilderi, Parlament depýtattary, ortalyq atqarýshy organnyń basshylary, «Atameken» Ulttyq palata, «Nur Otan» Partııasy jáne bıznes qoǵamdastyqtyń ókilderi qatysty. Jıyn barysynda Memleket basshysynyń bıznesti zańsyz ákimshilik qysymnan jáne qylmystyq qýdalaý qaýpinen qorǵaýdy odan ári arttyrý jónindegi tapsyrmasy boıynsha qabyldanyp jatqan sharalar jaıynda aıtyldy. Sondaı-aq ulttyq palatamen birlese otyryp, eki jol kartasynyń iske asyrylǵany, negizgi baǵyttar boıynsha 200-ge jýyq is-sharanyń oryndalǵany atap ótildi.
Bıznes sýbektilerin tekserýlerdiń júıeli túrde qysqarýy ákimshilik qysymnyń azaıǵanyn kórsetedi. Buǵan kóbinese josparly tekserýlerden bas tartý jáne kásipkerlerdiń qyzmetine túrli talaptardy 60 %-ǵa barynsha azaıtý arqyly qol jetkizildi.
Zańsyz tekserýler bir jarym esege azaıǵan. Zańsyz aralasý jaǵdaılarynyń aldyn alý úshin prokýratýra organdary tekserýlerdiń avtomattandyrylǵan aqparattyq júıesi – tekserý sýbektileri men obektilerdiń biryńǵaı tizimin iske qosty. Ol is júzinde táýekelderdi baǵalaý arqyly zańsyz tekserýlerdiń taǵaıyndalýyn boldyrmaıdy.
Bas prokýror bıznes salasynda áli de sheshimin tappaǵan birqatar aspektilerdiń bar ekenin, sondaı-aq olardy joıý úshin birlesken jańa sharalardy qabyldaý qajet ekenin aıtyp ótti. Jıyn qorytyndysy boıynsha jańa jol kartasy bekitildi. Oǵan básekelestikti jáne memlekettik-jeke seriktestikti odan ári damytý boıynsha keshendi is-sharalar, sondaı-aq ekologııa,ı eńbek, jer jáne veterınarııa salalarynda ýákiletti organdardyń tekserýlerdi taǵaıyndaýyna qoıylatyn talaptaryn qaıta qaraý boıynsha nysanaly jumys engiziledi dep kútilýde.
