PrimeMinister.kz-ke bergen eksklıýzıvti suhbatynda QR Ulttyq ekonomıka mınıstrliginiń Tabıǵı monopolııalardy retteý, básekelestikti jáne tutynýshylardyń quqyqtaryn qorǵaý komıtetiniń tóraǵasy Azamat Maıtıev qandaı jumystar júrgizilip jatqany jáne qandaı nátıjeler kútiletini týraly málim etti.
«Bıylǵy 12 qarashadan bastap oblystyq mańyzy bar barlyq qalalarda, Astana, Almaty jáne Shymkent qalalarynda turǵyndarǵa arnalǵan qoǵamdyq qabyldaýlar ashyldy, onyń barysynda kelip túsken usynystar men shaǵymdar júıelenip, tarıf qalyptastyrý úrdisi týraly túsinik beriledi jáne kelip túsken shaǵymdardy qarastyrýdyń qorytyndysy boıynsha turǵyn úı-kommýnaldyq sharýashylyǵy salasyndaǵy monopolısterge jospardan tys tekserýler júrgiziletin bolady», — dedi A. Maıtıev.
Tarıf qalyptastyrý úrdisiniń ashyqtyǵyn qamtamasyz etýdi kúsheıtý, monopolısterdiń tarıftik smetalar men ınvestısııalyq baǵdarlamalardy oryndaýyna baqylaýdy kúsheıtý maqsatynda biz zańnamaǵa ózgerister engizýge bastama bildirdik. Búgingi tańda tabıǵı monopolııalar týraly jańa zańdar Parlament Májilisiniń qaraýynda, olar tabıǵı monopolııalar sýbektileriniń tarıftik smetalaryn jáne ınvestısııalyq baǵdarlamalaryn oryndaýy boıynsha esepterin qaraýǵa tutynýshylardyń quqyqtaryn qorǵaý qoǵamyn qatystyrýdy kózdeıdi.
«Biz 2019 jyldyń 1 qańtarynan bastap tabıǵı monopolııalar sýbektileri úshin elektrondy tarıfterdi bekitý ótinimderiniń mindetti formatyn engizemiz. Bul rette tutynýshylarǵa atalǵan bazanyń materıaldarynyń tolyq qoljetimdi bolýy qamtamasyz etiledi. Tıisinshe, tutynýshylardyń tabıǵı monopolııalar ótinimderi boıynsha usynystary, eskertpeleri men suraqtary júıelenip, jarııa tyńdaýlarda qarastyrylady, olarǵa túsinikter beriledi. Osylaısha, tutynýshy óziniń barlyq suraqtaryna jaýap alady», — dedi monopolııaǵa qarsy vedomstvonyń basshysy.
Sonymen qatar zańnamaǵa túzetýler engizýge bastama bildirilgen. Máselen, tabıǵı monopolııalar sýbektileriniń tutynýshylardyń aldynda tarıftik smetalarynyń jáne ınvestısııalyq baǵdarlamalardyń oryndalý barysy týraly jyl saıyn esep berýinen jarty jyl saıyn jarııa esep berýine aýystyrý.
«Biz tabıǵı monopolııalar sýbektileriniń tarıftik smetalar men ınvestısııalyq baǵdarlamalardy oryndaýy boıynsha qoǵamdyq monıtorıng ınstıtýtyn engizýdi kózdeımiz. Iаǵnı, buqaralyq aqparat quraldarynyń, túrli qoǵamdyq birlestikter men uıymdardyń, jergilikti atqarýshy organdardyń, "Atameken" ulttyq kásipkerler palatasynyń ókilderiniń, tutynýshylardyń jáne basqa da múddeli tulǵalardyń tabıǵı monopolııalar sýbektileriniń ınvestısııalyq baǵdarlamalaryn qalaı iske asyryp jatqanyn kórýleri úshin sol sýbektilerdiń turǵyn úı-kommýnaldyq sharýashylyq nysandaryna barýy qamtamasyz etiletin bolady», — dedi A. Maıtıev.
Sonymen qatar, onyń aıtýynsha, kommýnaldyq qyzmetterdi tutyný normalaryn bekitý kezinde jergilikti atqarýshy organdardyń tutynýshylardyń aldynda jarııa tyńdaýlar ótkizý mindetteri qarastyrylatyn bolady.
«Qazir kommýnaldyq qyzmetterdi tutyný normalaryn jergilikti atqarýshy organdar bekitedi. Biz bul úrdisti, bul mehanızmdi jarııa formatqa aýystyrǵymyz keledi», — dep túıindedi Komıtet tóraǵasy.
