Bokstan Sıdneıde ótken XXVII Olımpıada chempıony Bekzat Sattarhanov alǵashqy jattyǵýlaryn osy sportzalda jasapty. Bokstan elimizdiń 6 dúrkin chempıony, KSRO-nyń 4 dúrkin chempıony, Azııa oıyndarynyń 2 dúrkin chempıony Nurjan Smanov ta kezinde osy zalda sheberligin shyńdaǵan. Iá biz aıtyp otyrǵan Ońtústik Qazaqstan ındýstrıaldy-qurylys kolledjiniń sport kesheni búginde kúrdeli jóndeýden ótip, jańa keıipke engen. Kúni keshe atalmysh sporttyq nysanda «kolledj dırektorynyń júldesine» arnalǵan voleıboldan II dástúrli týrnır ótti.
Kolledjde bilim alyp júrgen 1500-ge jýyq stýdentterdiń salaýatty ómir saltyn ustanǵan azamat retinde qalyptasýy oqý orny basshylyǵy men ustazdar nazarynan tys qalǵan emes. Iаǵnı, stýdentterdiń sapaly bilim alýmen qatar dene tárbıesi sabaqtaryn tıisti talap deńgeıinde ótkizip, túrli sporttyq úıirmelerge qatysýyna tolyq múmkindik jasalǵan. «Kolledj sport kesheniniń tarıhy tereń, qazaq sportynyń kóptegen juldyzdary alǵashqy jattyǵýlaryn osy zalda bastaǵan. Búginde stýdentterimiz aldyńǵy býyn aǵalarynyń dańqty jolyn jalǵastyrý maqsatynda sportpen aınalysyp, túrli deńgeıdegi jarystarǵa qatysyp júr. Elbasy Nursultan Nazarbaev sporttyń, onyń ishinde buqaralyq sporttyń damýyna árdaıym erekshe mán berip keledi. Kúni keshegi Qazaqstan halqyna Joldaýynda Elbasy óńirlik deńgeıdegi buqaralyq sport pen dene shynyqtyrýdy damytý qajettigin atap ótti. Búgingi voleıboldan uıymdastyrylyp otyrǵan týrnır de Joldaýlarda júktelgen mindetterdi júzege asyrý maqsatynda jáne «Rýhanı jańǵyrý» baǵdarlamasy aıasynda ótkizilip otyr», - deıdi ındýstrıaldy-qurylys kolledjiniń dırektory Albına Elshıeva.
Jastar arasyndaǵy jarysqa janashyrlyq bildirip, arnaıy kelgen dańqty sportshylardyń jeńis jolyndaǵy eńbegi, tózimdiligi men tabandylyǵy, otansúıgishtigi men azamattyǵy stýdentterge úlgi-ónege eterlik. Dańqty boksshy Sıdneı olımpıadasynyń, Álem chempıonatynyń kúmis júldegeri Muhtarhan Dildábekov, joǵaryda biz atap ótken Nurjan Smanov, sambodan álemniń úsh dúrkin chempıony, sondaı-aq djıý-djıtsý sport túrinen Álem kýbogy men Azııanyń eki dúrkin chempıony, «Alash praıd» klýbynyń sapynda óner kórsetetin «Suńqar» laqap atymen tanymal Arman Ospanov, bokstan Azııa jáne Azııa oıyndarynyń chempıony, Álem birinshiliginiń qola júldegeri Dosjan Ospanov, mýaı - taı men kıkbokstan QR sport sheberi, QR eńbek sińirgen jattyqtyrýshysy Sultanǵalı Qýandyq jeńimpazdardy marapattaý, týrnırdiń jabylý saltanatyna qatysyp, stýdenttermen áńgimelesti. Shymkent mýaı-taı sport federasııasynyń vıse-prezıdenti S. Nurlybaıulynyń aıtýynsha, osydan on jyldan astam ýaqyt buryn bul sport nysany tozyp, kútimsiz jatqan. «Sol jyldary biz osynda kelip mýaı-taı seksııasyn ashtyq. Iá bul talaı chempıondar sheberligin shyńdaǵan tarıhı zal. Shymkentte sportzaldar kóp, biraq munyń bir erekshe qasıeti bar. Osy zaldan biz 5 birdeı Álem chempıonyn shyǵardyq. Iаǵnı kolledjde bilim alyp jatqan jastardyń búginde kúrdeli jóndeýden ótip, tolyq jabdyqtalǵan sportzalda shynyǵyp, jeńisterge jetýge múmkindigi mol», - deıdi S.Qýandyq.
Sonymen, stýdentter arasynda ótken týrnırde 19 komanda saıysqa túsip, jeńimpazdardy anyqtady. Árbir kezdesý tartysty ótken týrnırde I oryndy «Elektr gazymen dánekerleýshi» S-1801 toby, II oryndy «Elektromonter» EM-1818 toby, sondaı-aq III- oryndy «Avtomobıl jóndeýshi slesar» AS-1810r tobynyń stýdentteri ıelendi. Jeńimpaz komandalarǵa arnaıy kýboktar men medaldar tabys etildi.
Ǵalymjan ELShIBAI,
«Egemen Qazaqstan»
Shymkent
