Aqıqattyń aldaspany

Qylshyldaǵan jıyrma-jıyr­­ma besterinde jasyndaı jar­­­­­qyldaǵan, otyzynda or­da buzǵan, qyrqynda qamal al­ǵan, elýinde halqynyń arqasúıer Eri bolyp, alpysynda aqyl­man Abyzyna aınalǵan Sher­aǵańnyń ulttyń uly muraty jolynda namys naızaǵaıyn shatyrlatpaǵan kezi sirá joq shy­ǵar. Zańǵar jazýshylyǵyn bylaı qoıǵanda, Sherhan Murtaza esi­mi táýelsizdikke deıingi jáne keıingi qazaq baspasóziniń jarty ǵasyrdan astam derlik tutas dáýirin aıshyqtaıtyn tuǵyrly tulǵasy. Osy jyldar ishinde Sher­aǵańnyń shekpeninen shyqqan ja­zýshy-jýrnalısterdiń tolqyn-tolqyn qosyny jasaqtaldy, olardyń arasynda Farıza Ońǵarsynova, Aqseleý Seıdimbek, Oralhan Bókeı syndy kórnekti shoǵyry ult rýhanııatynyń aıtýly tul­ǵalary dárejesine jetti. Sher­aǵańnyń shekpeninen shyǵý qa­zaq jýrnalısteri úshin baqyt, maqtanysh. Al «Sheraǵańnyń shekpeninen shyqqan» degen sóz orys ádebıetiniń altyn ǵa­sy­ryndaǵy F.Dostoevskıı aıt­qan: «Bárimiz Gogoldiń «Shıne­linen» shyqqanbyz» deıtin áı­gili aforızmimen birdeı qazaq qanatty sózderiniń altyn san­dyǵyn nurlandyrady. 

Bizge Sherhan Murtaza aǵa­myzdyń táýelsizdiktiń eleń-alań araı tańyndaǵy almaǵaıyp ótpeli kezeńde Otanymyzdyń bas gazetiniń baǵytyn aıqyndap, basynda turǵan jyldardaǵy kátepti qaranar qyzmeti aıryqsha qymbat. Ol basqarǵan jyldar gazetke úlken serpilis ákeldi. Jolbarys júrekti, abyz tilekti, balýan bilekti Sher­aǵań osy kezde egemendikke bir­­jola bet burǵan eldik saıa­sattyń batagóı uranshysy bol­ǵany anyq. Keńestik kerdeń saıa­sattyń keteýi kete qoımaǵan sosıalıstik qoǵamda turyp-aq bul sosıalızmniń nıeti túzý bolǵanymen, halyq senimin aqtamaǵanyn gazet betinde alǵash aıǵaılatyp ashyq aıtqan da Sherhan Murtaza. Elbasy Nursultan Nazarbaevpen eldi­gimiz ben birligimiz, táýel­sizdik murattary, egemen eldiń basqa da san qıly máseleleri haqynda keń kólemdi, temirqazyq maqsatty aıqyndar maǵynaly suhbattar jasap uıymdastyrýdyń, Memleket basshysynyń shetelderdegi alǵashqy saparlaryn kelisti kórsetýdiń buryn bolmaǵan keremet úlgi-úrdisterin bastap bergen de Sherhan aǵa. Sol saparlarda shettegi qandastarymyz jaıly aıtqan da, olardyń atamekenge degen sherli saǵynyshyn alǵash jetkizgen de aıkól Sheraǵań. 

Búginde Sherhan Murtazanyń «redaktorlardyń redaktory» dep atalýy óte ádil baǵa! Ol shyn mánindegi halyq súıip oqı­tyn oqylymdy, batyl ıdeıaly, ózi sııaqty bahadúr gazet ja­saýdyń has sheberi boldy. Re­daktor retindegi basty er­lik­teriniń biri – sosıalıstik qo­ǵam­nyń siresken muzy áli ji­bi­megen kezde «Sosıalıstik Qa­zaq­stan» gazetiniń ataýyn bar qa­jyr-qaıratyn jumsaı otyryp, «Egemendi Qazaqstan» dep aýystyrýy der edik. Bul 1991 jyldyń 18 maýsymy bolatyn. Sodan beri el gazeti «Egemen» de aqıqattyń, ádilettiń aq jolynan adaspaı, ulttyń múdde-muratyn ulyqtaýmen keledi.

Alash arystarynyń jolyn jalǵastyrǵan Sheraǵańnyń ómir­sheń ónegesi bizge abyroıly ama­nat, sondyqtan ol elimizdiń júz­jyldyq jylnamasymen birge jasaı beredi... 

Rýhyńyz peıishte shalqysyn, aldaspan aǵa... 

Darhan QYDYRÁLI