Onkúndik aıasynda mektep oqýshylary arasynda erýdıt, esse jazý saıystary, Márııam apanyń ómiri men shyǵarmashylyǵyna arnalǵan tanymdyq dóńgelek ústel otyrystary t.b. is-sharalar ótti. Márııam Hakimjanovanyń óleńderin jattap, mánerlep oqýdan qalalyq mektep oqýshylary arasynda ótken baıqaý aqynnyń týǵan kúnine sáıkestendirildi jáne onkúndikti qorytyndylady.
«Onkúndikti uıymdastyrǵan sebebimiz, balalar mekteptiń atyn ıelengen aqynnyń ómiri men shyǵarmasyn jaqsy bilsin degen maqsatymyz boldy», deıdi mektep dırektory Hanzada Shymbolatova. Baıqaýǵa oblys ortalyǵyndaǵy qazaq jáne orys mektepterinen 32 oqýshy qatysty. Qatysýshylar negizinen Márııam apanyń óleńderin jatqa aıtty. Kelesi bir top Márııam apaǵa arnaǵan balǵyn óleńderin oqydy.
Ádil-qazylar alqasynyń sheshimi boıynsha, Márııam oqýlaryn jatqa mánerlep oqýdan qazaq mektepteri arasynan birinshi oryndy №115 mekteptiń oqýshysy Qaraqat Qabdyrahım alsa, orys mektepteri arasynan Fızıka-matematıka lıseıiniń oqýshysy Karıne Mnasakanıan jeńimpaz boldy. Al Márııam apaǵa óz óleńin arnaǵan balapan qanat aqyndar arasynda birinshi oryndy qazaq mektepteri arasynan №20 mekteptiń oqýshysy Rahat Seıtqan alsa, №17 orys mektebinen kelgen Dııas Talǵatov úzdik dep tanyldy. Qalǵan oqýshylar arasynan oza shapqandar sheberlikteri men daıyndyqtaryna qaraı ekinshi, úshinshi oryndardy bólisti.
«Baıqaýda orys mektepterinen qatysqan 13 oqýshynyń qazaq aqyny óleńderin mánerlep oqýǵa degen daıyndyǵy men ynta-yqylasy qazylar alqasyn rıza etti. Karıne Mnasakanıan Márııam apanyń 20 óleńin jatqa aıtty, múdirmeıdi, tilinde bir múkis joq. Bul memlekettik tildiń bolashaǵy búgingi jas urpaqta degen senimdi nyǵaıta túsedi», dedi qazylar alqasynyń múshesi, Oblystyq tilderdi damytý basqarmasynyń bólim basshysy Baqytgúl Súleımenova.
Názıra Járimbet,
«Egemen Qazaqstan»
Qostanaı
