Qoǵam naryqtyq zamanda qatigezdenip ketti dep kústanalaǵanmen adamdar arasynda jaqsylyq jasaýǵa asyǵatyn jandar az emes. Sondaı jekelegen azamattardyń ıgi bastamalary bir arnaǵa toǵysyp, úlken bastaýlarǵa aınalyp jatqany qýantady.
Mine sondaı ıgilikti jobalardyń biri retinde Shymkent qalasynda muqtaj jandar úshin «IZGILIK» dep atalatyn tegin dúken ashyldy.
Atalǵan dúken kún kóris deńgeıi tómen otbasylar men jetim-jesirlerdi azyq-túlik, kıim-keshekpen qamtamasyz etýdi maqsat etken.
Munda tek materııaldyq kómek kórsetilip ǵana qoımaı, jumyssyz azamattardy qabiletine qaraı jumysqa úıretedi. Osylaısha olardyń qoǵamda óz ornyn tabýyna septigin tıgizedi.
«Izgilikte jarysaıyq» qaıyrymdylyq qoǵamdyq qorynyń uıymdastyrýymen jumys bastaǵan bul áleýmettik úıden muqtaj jandar aptanyń 6 kúninde qajetti zattaryn tegin alýyna múmkindik bar. Ol úshin ózimen birge jeke kýáligin, áleýmettik az qamtylatyn top ekendigin anyqtaıtyn qujatyn alyp kelse jetkilikti.
Dúkenniń ishki erejesi boıynsha aıyna bir muqtaj jan tek bir ǵana kıimge ıe bolmaq. Azyq túlikti de otbasyndaǵy adam sanyna qaraı shamalap alyp kete alady. Al, dúken sórelerindegi zattar qaıyrymdy qala turǵyndarynyń kúndelikti osy áleýmettik úıge alyp kelgen tartýlary. Aınalasyna qaraılasqandy azamattyq paryz sanaıtyn jandar Shymshahardaǵy Elshibek batyr kóshesinde ornalasqan 88 úıge at basyn buryp, qajetti turmystyq zattardy ákelip ótkizýge bolady.
-Tek kıim-keshek taratyp qana qoımaı, qystyń kózi qyraýda jaýramas úshin otyny joq januıalarǵa kómir túsirip berýdi josparlar otyrmyz. Árıne, bul ýaqytsha ǵana kómek. Degenmen, osyndaı saýapty isterdi kóptep uıymdastyrý arqyly qoǵam nazaryn áleýmettik jaǵdaıy tómen otbasylarǵa, múgedek jandarǵa aýdarý. Tipti, eńbekke qabilettiligi joq aǵaıynǵa qaıyrymdylyq qor arqyly baspanamen amtamasyz etýdi qolǵa aldyq. Osy jyly kásipkerlerdiń qarjylaı qoldaýymen 2 úı satyp aldyq. Aldaǵy ýaqytta sony úısiz-kúısiz júrgen otbasylarǵa tabystaıtyn bolamyz», deıdi «Izgilikte jarysaıyq» qaıyrymdylyq qoǵamdyq qorynyń basshysy Asqar Máýlenov.
Dúken ashylǵan 10 kún ishinde 250 otbasyǵa kıim-keshek, 50-den astam januıaǵa áleýmettik, turmystyq zattar úlestirilgen. Aldaǵy ýaqytta dúken jelilerin aýdandardan ashyp, aýyldaǵy áleýmettik jaǵdaıy tómen otbasylarǵa kómek qolyn sozýdy josparlap otyr eken.
Keıde kúndelikti qoqys jáshiginiń qasynda úıilip jatqan jamaý-jasqaýsyz kıim-keshek pen qalta toly aq nan qaldyqtaryn kórgende qaıyrymdylyqqa moıyny burylmaı júrgen adamdardyń qylyǵyna ishteı ishiń ashıdy. «О́zinen artylǵandy dalaǵa tastaǵansha nege muqtaj jandarǵa úlestirmedi eken?», degen suraq týyndaıdy...
Múmkin bul jandar «kereksiz» zattaryn kimge bererin bilmeı júrgen shyǵar. Endeshe, Siz sol jandarǵa «IZGILIK» degen dúkenniń meken-jaıyn kórsetip jiberseńiz, sonyń izi de qaıyrymdylyqqa parapar is bolmaq.
Nurshat TО́KEN,
«Egemen Qazaqstan»
