Talaı urpaqtyń estetıkalyq talǵamyn tárbıelegen bul shyraıly shyǵarmalar orys mádenıeti tarıhynda oıyp otyryp oryn alatyn «Kúmis ǵasyr baletteri» toptamasyndaǵy topjarǵan jaýharlar qataryna jatady. Sóz reti kelip turǵanda atalmysh aǵymǵa az-kem anyqtama bere ketkenimiz jón sekildi. Altyn ǵasyry aıaqtalyp, aptyǵy basylǵan Reseı rýhanııaty XIX ǵasyrdyń aıaǵynda daǵdarysqa ushyrap, baıaǵy dańqynan aıyryla bastady. Mine, osyndaı qundylyqtar quldyraǵan tusta K.Stanıslavskıı, V.Nemırovıch-Danchenko sııaqty tulǵalar orys mádenıetin qaıtadan órge súırep, ekinshi tynysyn ashty. Oıyn-saýyq ornyna aınala bastaǵan kıeli sahnanyń óńi kirdi. Máskeý kórkem teatrynyń (MHT) qabyrǵasy qalanyp, súbeli pesalar repertýar qoryn baıytty. Sondyqtan da osynaý qaıta órleý kezeńi «Kúmis ǵasyr» dep atalady.
Eldi eleńdetken jańashyl baǵyttar balet ssenasyn da qamtydy. Ondaı ońdy ózgerister negizinen bilikti maman M.Fokınniń esimimen tyǵyz baılanysty ekenin aıtýǵa tıispiz. Ol býynsyz bıshilerdi bastap baryp ataqty mesenat S.Dıagılev uıymdastyrǵan Parıjdegi Orys maýsymyna qatysyp, úlken abyroıǵa bólendi. Sondaǵy ártisterdiń ishinde A.Pavlova, V.Nıjınskıı, T.Karsavına, E.Gelser tárizdi talanttary tas jarǵan tarlandar bolǵanynan da habarymyz bar.
Teatrdyń baspasóz qyzmeti aldyn ala taratqan aqparattarda «Shopenıana» men «Sheherezada» kópshilik kóńilin kónshitetinin alǵa tartady. О́ıtkeni ustyny berik óner ujymynyń shyǵarmashylyq múmkindigi óte joǵary. Ańyzǵa aınalǵan horeografııa men Vıktor Karare, Anatolıı Nejnyı qatarly has sheberler ázirlegen kórneki ssenografııalar kózdiń jaýyn alady. Dekorasııalarda sol zamannyń poetıkalyq rýhy kórinis tapqan. Kostıýmder Mılandaǵy «Instıtýto Marangonı» akademııasynyń túlegi Arasel Dosmuratova men daryndy sýretshi Elena Nesvetaeva-Dolgalevanyń eskızderimen tigilgen.
Qalǵan qyzyqtyń bárin 30 qarashada «Astana Operaǵa» kelip, óz kózderińizben kórgenderińiz durys, qadirli ónersúıer qaýym.
Talǵat BATYRHAN,
«Egemen Qazaqstan»
