Jıyndy ashqan ýnıversıtetiniń oqý-tárbıe jumystary jónindegi prorektory Baqythan Ábdikárimov Elbasy maqalasyndaǵy taraýlar boıynsha óz paıymdaýlaryn taratty.
Qazaqstan tarıhy kafedrasynyń aǵa oqytýshysy, tarıh ǵylymdarynyń kandıdaty Ázilhan Tájekeev Elbasynyń «Uly dalanyń jeti qyry» atty maqalasy elimizdiń ulttyq tarıhyn jazýdaǵy jumystardyń jemisi ekendigin aıtty.
- Bul halqymyzdyń 7 qyry – alda jazylatyn tarıhtyń 7 úlken taraýy. Sebebi, munda kóne zamandar, qola dáýirindegi metallýrgııa salasy, saqtardyń dala kóshpendileriniń ańdyq stıli, túrkilerdiń ımperııasy týraly, Uly Jibek joly boıyndaǵy qalalar týraly aıtylady. Bul bizdiń búgingi tarıhty qaraı otyryp, kóne tarıhtan sabaq alý bolyp tabylady. Elbasy bul maqalasy arqyly qaı baǵytta qalyptasý kerektigin kórsetip berdi, -dedi ol.
Jıynda ýnıversıtettiń fılosofııa jáne mádenıettaný kafedrasynyń meńgerýshisi, fılosofııa ǵylymdarynyń kandıdaty Ońǵar Bermahanov «Arhıv-2025» baǵdarlamasyna qatysty pikirin aıtyp, qoldaý bildirdi.
Maqalanyń betasharynda Elbasy búgingi kóptegen memleketterdiń óz jerinde bolǵan órkenıet ıgilikteriniń ıesi ekendigin taratyp aıtqan. Iаǵnı, qazaq ataýyn keıinirek alsa da búgingi ulanǵaıyr dalamyzda ótken oqıǵalar halqymyzdyń ýaqyt sarǵatqan paraqtary, óz tarıhy.
Osy jaǵyn basa aıtqan ǵalymdar Memleket Basshysy kótergen máselelerdi iske asyrýǵa atsalysatyndyqtaryn aıtty.
Baqtııar TAIJAN,
«Egemen Qazaqstan»
Qyzylorda oblysy
