Túrkııanyń «TRTAVAZ» telearnasy Memleket basshysynyń jańa maqalasynda qolǵa alynýy josparlanǵan jobalarǵa nazar aýdaryp, Túrki álemi úshin tyń jańalyqtar júzege asyrylatynyn aıtqan.
Belgili saıasatker, «VATAN» gazetiniń kolýmnısi Kúrshad Zorlý «Qazaqstan Prezıdenti Nursultan Nazarbaev Túrki álemine jańa serpin alyp keletin «Túrki órkenıeti: túp-tamyrynan qazirgi zamanǵa deıin» jobasyn jarııalady. 2019 jyly Astanada álem túrkologtarynyń basqosýy josparlanǵan. Odan bólek Vıkıpedııa úlgisinde Túrki halyqtaryna ortaq týyndylardyń biryńǵaı onlaın kitaphanasyn ashý qolǵa alynady», dep óz oıymen bólisti.
Reseıdiń «MIR 24» telearnasy elimizde tól tarıhymyzdy zertteýge negizdelgen alty aýqymdy jobanyń júzege asatynyn, saıasatkerler men ǵalymdar arhıv isin qolǵa alyp, buǵan deıin sheshilmegen shejireniń halyqqa jol tartatynyn habarlaıdy.
Telearnanyń aıtýynsha, Qazaqstan – topyraǵy kóptegen jańalyq pen órkenıettiń bastaý alǵan jeri. Sonymen qatar elimizdiń soltústik óńirindegi eneolıt dáýirine tıesili «Botaı» qonysynda júrgizilgen qazba jumystary jylqynyń tuńǵysh ret qazirgi Qazaqstan aýmaǵynda qolǵa úıretilgenin dáleldengenin habarlaǵan «MIR 24» sońǵy jyldary elimizde tarıh pen mádenıetti damytýǵa baǵyttalǵan sharalardyń kóptep uıymdastyrylyp jatqanyn aıtypty. «Mádenı mura» men «Rýhanı jańǵyrý» baǵdarlamalary aıasynda myńdaǵan aýqymdy zertteý jumystary júrgizilip, ol sharalardyń el asyp, shetelde de jalǵasyn tapqanyn nazardan tys qaldyrmapty.
О́zbekstannyń «FERGANA NEWS» aqparattyq agenttigi ejelgi qalalardyń orny, ortaǵasyrlyq arhıtektýra eskertkishteri men ulttyq dástúr arqaý bolǵan Elbasynyń jańa maqalasynan úzindiler keltirip, «Rýhanı jańǵyrý» baǵdarlamasynyń nátıjelerimen bólisken. Aqparat agenttiginiń aıtýynsha, baǵdarlama aıasynda latyn qarpine kóshý men «100 jańa esim» jobasy bastalyp, «Qazaqstannyń sakraldy kartasynyń» jasalýy qolǵa alynǵan.
Sonymen qatar Elbasy maqalasynda halyq mýzykasy men folklorǵa erekshe mán berilip, Qazaqstannyń túkpir-túkpirine ekspedısııalar júrgizip, «Dala folklorynyń antologııasyn» jasaqtaýdy qolǵa alý usynylǵanyn habarlaǵan. Budan bólek Prezıdenttiń memlekettegi týrızmdi damytýdy jolǵa qoıý josparymen bólisipti.
Rýmynııalyq «NINE O’CLOCK» gazeti Elbasynyń jańa maqalasyn jarııalap, el tarıhyn jańǵyrtýǵa baǵyttalǵan jobalardyń júzege asatynyn habarlaǵan. Aqparat quraly ótkenin maqtan tutyp, búginin naqty baǵalaı bilý jáne bolashaqqa oń kózqaras tanytý – Qazaqstandy tabysqa jeteleıtinin jazypty.
Daıyndaǵan Svetlana ǴALYMJANQYZY,
«Egemen Qazaqstan»
