Aýdan-aýyldarǵa erinbeı baryp, oqýshylarmen kezdesip, kásiptik baǵdar jumysyn belsendi júrgizgen joǵary oqý oryndarynyń biri - О́skemendegi Sársen Amanjolov atyndaǵy Shyǵys Qazaqstan memlekettik ýnıversıteti. Bilim ordasynyń rektory, professor Muhtar Tólegenniń ózi bastaǵan, fakýltet dekandary, kafedra meńgerýshileri qostaǵan ýnıversıtet qyzmetkerleri bıylǵy qańtar, sáýir-mamyr aılarynda oblystyń 11 aýdany men 1 qalasynda bolyp, oqýshylarmen kezdesip qaıtypty. «Biz arnaıy marshrýt jasadyq. Kezdesýlerde burynǵydaı bir professordy aparyp, eki saǵat sóıletken joqpyz. Sol aýdannyń, aýyldyń mektepterin bitirgen stýdentterdi ózimizben birge erte bardyq. Osy jumystardyń nátıjesi deýge bolatyn shyǵar, bıyl qyryqqa jýyq sport sheberleri, Álem, Azııa chempıondary, 39 «Altyn belgi», 40 úzdik attestat ıegerleri bizdiń ýnıversıtetke oqýǵa tústi. Oqý ornynda qoǵamnyń suranysyna ıe 17 jańa mamandyq ashyldy. Ýnıversıtet tarıhynda alǵash ret ıntegrasııalanǵan matematıka-fızıka, matematıka-ınformatıka, fızıka-ınformatıka, hımııa-bıologııa, geografııa-tarıh mamandyqtaryna talapkerler qabyldandy. Erekshe atap óter dúnıe, jyl saıyn 1 kýrsqa qabyldanatyn talapkerler myń-myń jarymnan aspaıtyn bolsa, bıyl 2600-den asty», - degen oqý ornynyń rektory M.Tólegen bıyl grant ıegerleriniń sany artyp, 814-ke (2017 jyly - 606) jetkenin tilge tıek etti.
Sonymen qatar 2018 jyldyń sáýir aıynda ýnıversıtet rektorynyń bastaýymen Túrkistan, Qyzylorda oblystarynyń barlyq aýdan mektepterinde «Ýnıversıtet kúnderi» ótkizilip, 12 stýdentten turatyn daryndy, talapty jastar konserttik shara uıymdastyrypty. Osy sapar aıasynda Túrkistan oblysy ákimdigimen yntymaqtastyq týraly memorandýmǵa qol qoıylypty. Jalpy, 2017-2018 oqý jylynda kásiptik baǵdar jumysyn júrgizý maqsatynda uzyn sany 1241 issapar uıymdastyrylǵan eken.
Reti kelgende aıta keteıik, búgingi tańda oqý ornynda 6453 stýdent bilim alyp jatyr. Onyń – 5498-si bakalavrıat, 345-i - magıstrant, 18-i - doktoranttar, qalǵany kolledjde bilim alýshylar.
Azamat QASYM,
«Egemen Qazaqstan»
Shyǵys Qazaqstan oblysy
