– Semeı qalasyndaǵy memlekettik medısına ýnıversıtetinde eń úzdik dárigerler daıarlanady, − dedi Danıal Kenjetaıuly, − Shyǵys óńirinde búkil medısınany halyqaralyq standartqa saı jabdyqtap otyrmyz. Bul − adamdardyń ómir súrý sapasyn jaqsartý qadamy. Turǵyndar ál-aýqatynyń jaqsarǵandyǵyn árdaıym sezinýi tıis. Semeıdegi Jedel medısınalyq járdem aýrýhanasynda jańa jyldan bastap operasııa jasaıtyn gıbrıdti zal jumys isteıdi. Mundaı operasııa jasaıtyn zal TMD elderinde de, Reseıde de joq. Turǵyndarymyz operasııa jasaý úshin endi Reseıge aǵylmaıdy. Kerisinshe Novosibir qalasy sııaqty kórshiles qalalar turǵyndary bizge qaraı aǵylatyn bolady. Aıagóz qalasynda ınsýltty ortalyq ashyp, eń joǵary deńgeıli perzenthanany iske qostyq. Zyrıan qalasynda, qazirgi ataýy Altaı, ol jaqta da osylaı ekenin atap ótkim keledi. Al endi bilim salasyna kelsek, «Nur Otan» partııasynyń sezinde 2020 jylǵa deıin elimiz boıynsha 1000 IT-synyp ashý týraly tapsyrma berildi. Bizdiń oblysta ár mektep boıynsha tolyq jabdyqtalǵan IT-synyptar bar. Olardyń deńgeıi joǵary, biz robot-tehnıka synyptaryn baǵdarlaý synyptarymen biriktirdik. Eger osy IT-synyptardy jańadan ornatsaq, onda baǵdarlamanyń franzıshasyna 2,7 mıllıard teńge tóleýimiz tıis edi. Biraq Semeıdegi elektrtehnıkalyq kolledj ujymy bul baǵdarlamany ózderi jasap shyǵardy. Bilim jáne ǵylym mınıstrligi osy bastamany bekitti. Sondyqtan qanshama qarajatty únemdep qaldyq. Sóıtip IT-synyptar úshin qajetti baǵdarlamany 52 mıllıon teńgemen qamtydyq. Endi mine keler jyly óńirdiń 655 mektebinde IT-synyptar tolyq jumysqa kirisedi. Semeı qalasynyń ár turǵyny ekonomıkanyń kóterilip kele jatqandyǵyn bilýi kerek. Qala aýlalarynda 4 myń beınekamera ornatamyz. Tipti Eýropanyń kóptegen qalalarynda mundaı jańashyldyq joq. Qalany kóriktendirip, shetkeri aýdandardyń ınfraqurylymyn qalypqa keltiremiz.
Oblys ákiminiń aıtýynsha, Polkovnıchıı araly endi Beıbitshilik atalyp, ekologııalyq saıabaqqa aınalmaq.
– Aralǵa keler jyly kópirdiń irgetasy salynady, − dedi oblys basshysy − osyndaı dúnıe О́skemen qalasynda qolǵa alynǵan. О́skemende mamyrǵa deıin daıyn bolady, al sizderde qyrkúıekke deıin jasalýy tıis. Osylaısha semeılikter úshin sportpen aınalysyp, demalatyn tamasha oryn paıda bolmaq. Men Semeıdegi jumys oryndaryn da qadaǵalaıtyn bolamyn. Semeı elimizdegi eń myqty qalaǵa aınalýy tıis.
Raýshan QABJANQYZY,
«Egemen Qazaqstan»
SEMEI
